今個星期日，我選擇咗去大陸深圳行吓，深圳有乜好行？我只係揀咗『羅芳』呢個地方，因為我喺香港住嘅地方對面就係深圳羅芳，只不過一網之隔，雖然我對住羅芳有成20幾年，睇住對面啲樓係咁起，睇住對面係咁炸山，但從來未試過過去睇吓咩環境，所以今次真係大鄉里出城喇。
首先講吓羅芳歷史，香港未俾英國管治時，羅芳村嘅地域範圍包括依家嘅深圳羅芳村及依家嘅香港絞寮村，英國管治後羅芳村一分為二，去到上世紀80年代，深圳羅芳村發展，同對面嘅絞寮村剛好相反，一邊處處高樓，商機無限，一邊雜草叢生。雖然羅芳村係深圳第一個萬元村，但係之後邊境政策失去優勢，羅芳村發展緩慢，俾隔離嘅黃貝嶺爬咗頭。
要去呢個地方，以前俾2-3蚊搭巴士就到，依家搭深圳地鐵去新秀站落車就搞掂，都係3蚊而且更快。我呢啲邊境居民返大陸嘅好處就係唔洗搭火車，搭10分鐘小巴去沙嶺在行去火車站在用通行證就得，不過有個方法其實可以更快返到大陸，香港呢面嘅蓮麻坑道有條橋叫『國際橋』，一行過去就可以通去深圳羅芳村，不過只有少數人合資格可以申請許可證。
講返羅芳村，其實只不過係普通小區，因為唔係重點商業區所以冇咁嘈，我黎到其實就係想企喺到睇返一網之隔嘅香港，睇吓個感覺係點，不過我發覺你想行埋去邊境前端係好困難嘅事，因為多數喺邊境前端嘅2-300米範圍內已經冇路可走前，喺香港我會揾地方突入，但大陸我真係淆底，所以只好離遠睇，雖然對面香港乜都冇亂草就一堆，但係始終覺得對面都係好啲，深圳點發展點有錢都好啦，都係有好多嘢唔夠香港好。
由新秀站唔記得乜出口一出，經羅芳路一直走去到水庫東路，在向植物園方向去，經過聚寶路，蓮塘，都係望咗一陣，冇咩好停留，於是乎搭3蚊巴士去沙頭角，去到只為企喺海景棧道望住對面嘅香港沙頭角亞公咀之景，走之前揾嘢食，發覺好多餐廳招工冇人做，呢個時候大陸同香港一樣飲食業請人難。最後是旦揾咗間肯德基食咗過貴過香港嘅咖哩豬扒飯，總知去對面民工飯堂食兩菜飯盒好過，之後就返香港繼續仆街生活。
羅芳、蓮塘一帶相信住係幾舒服嘅，不過望見對面嘅香港蓮麻坑，雖然乜都冇，但係生態價值好高，因為屬於禁區，所以呢度變咗動物樂土，但係遲早有一日，呢度會變成同羅芳、蓮塘一樣。
呢條蓮麻坑路我行咗20幾年，一網之隔就係另一角度，但係我從來未試過喺對面望返去香港蓮麻坑路，今次趁仲有50蚊人仔未用好好實現呢次旅程，坐深圳地鐵去新秀站落車，即刻發現乃嘢，Google地圖錯誤百出，地圖顯示新秀站出口就喺蓮麻坑路對面，但事實上新秀站位置喺羅芳山前，一山之隔先係蓮麻坑路，所以話，網上嘅資料有時係可以方便到好多人，但唔係萬能，有時信自己更好！
羅芳山有好多山墳，不過問過人冇山路過到去山後，要繞路過，繞咪繞囉，首先喺新秀站出發，沿羅芳路走，一路都係賣海鮮，原來我懷疑咗20幾年對面就係海鮮街黎嘅，過咗海鮮街沿路繼續行，見到對面香港綠色小巴飛車，呢面就深圳大巴同改裝單車鬥搶路仲要改裝單車搶贏，感覺確係奇妙。終於行到去鐵絲網前，好多告示牌寫住『打击偷渡，举报有奖』，偷渡？今時今日不知幾多香港人想鳩衝返大陸揾人仔，而且大陸人落黎鬼咁易，邊到仲有人偷渡，得罪共產黨都唔會偷渡香港避難啦，打擊走私就差唔多！
雖然有鐵絲網圍住，不過鐵絲網係有門而且打開嘅，咁又點打開咗都冇人會敢行埋去，分分鐘半隻腳差入去已經俾火箭炮射到啲手腳飛咗去對面香港。沿路繼續行，去到羅芳村大門，呢度冇記錯就係前中國國腳陳永強俾人斬嘅地方，其實都係普通小區，四圍都有避孕套販賣機，雖然話因為一孩政策先有咁多避孕套販賣機出現，不過羅芳村就係出名多平雞叫，所以咁多避孕套販賣機唔係冇道理，我呢啲正經柒頭皮梗係冇在深研呢個問題啦，行返出去門口影幾張相就算，但係近幾年羅芳村起咗兩棟10幾20層高嘅私樓，真係九唔搭八，喺我屋企個到望過去簡直係大殺風景。最後在沿鐵絲網行去羅沙公路方向，行到一半終於見到屋企，即刻隔住條河同鐵絲網大嗌媽咪！媽咪！一陣間我返黎要食炒飯！勁呀，連長途電話費都慳返！
呢啲鐵絲網喺上世紀起咗好大作用，但係相信終有一天作用不在，唔知幾時喇。
没有评论:
发表评论