題為編輯所擬
來季港甲焦點之一一定係城門谷運動場正式用於比賽中，以往港乙、丙某啲比賽都會放喺呢度打，但甲組冇記錯係首次。城門谷運動場位處城門谷公園隔離，唔係咁多人去過，有球迷就話唔係咁方便，有球迷就話路程上行得舒服過去大球場，大家各有各見解，甚至為咗城門谷運動場用鍵盤格劍，盡傷感情。正所謂講多無謂做就最實際，究竟呢個場點去先會好啲，路程要幾耐，不如自己親身去一躺勝過千言萬語。
有見及此，今朝我一早就去到大窩口地鐵站B出口，去挑戰呢段所謂傳說中驚天動地泣鬼神好比神山一樣難行嘅城門谷運動場上山玩命之路兼計時睇吓要行幾耐。由於我係搭巴士黎嘅，所以冇計到由地鐵站B出口行上黎嘅時間，如果由地鐵站行上去大約都要5分鐘內。好喇，8點14分到地鐵站B出口，身上帶住discman乙部，唔係用黎解放一路上之寂寞，啲歌曲其實除咗聽之外仲可以用黎計時，唔信？睇住啦！
對對錶，8點15分，行得！呢個時候美國新金屬樂隊Dry Kill Logic嘅《Goodnight》響起，挑戰所謂傳說中驚天動地泣鬼神好比神山一樣難行嘅城門谷運動場上山玩命之路兼計時正式開始！娘親，孩兒不孝，先行一步！親愛嘅朋友，球迷，你地要保重呀，今次呢個挑戰非同小可，因為根據坊間所形容，走此山谷非常攞命，每次睇到網上嘅人留言都嚇到我汗流滿面，今次分分鐘一去冇回頭，所以我停低俾自己諗十秒，地鐵站B出口就喺你面前，返轉頭仲黎得切，究竟上定落？神阿！俾啲指示我呢隻迷途小羔羊好嗎？呢十秒真係非常難過，就喺呢十秒時間內我突然諗起一首由李石主唱嘅歌叫《不要放棄》之其中一段：
『相信我請不要放棄/請給我多一些鼓勵/讓我勇敢的走下去
理解就是我堅持的動力/不要懷疑別再哭泣/這並不是你我的絕境/讓愛融化世間堅硬的冰』
哇，立刻老撚鳳都打死十個，勇氣返晒黎喇，冇人會阻到我架喇，挑戰所謂傳說中驚天動地泣鬼神好比神山一樣難行嘅城門谷運動場上山玩命之路兼計時正式開始！
第一回之迎戰關門口村
穿過公園過咗馬路就會見到霸氣十足之『關門口村』，呢個時候就要行過馬路去對面，不過大家過馬路記住睇車呀，正所謂馬路如虎口。
第二回之迎戰新界南總區警察總部及行動基地
過馬路後就會見到關門口村內有一條天梯，不過唔好扮醒目話我知啦行上去就到喇，正確應該沿新界南總區警察總部及行動基地方向行上去。
第三回之征服德士古道北
轉過彎就會見到微微上斜嘅德士古道北一段路，其實呢段路唔係太難走嘅，如果行少少斜路都唔掂嘅人，不仿試吓吊轉個身去行，咁心理上會冇咁辛苦，我睇漫畫學返黎。大家試想吓，成千人喺德士古道北吊轉個身去行，何其壯觀。
第四回之初見玩命之路路口
成功征服德士古道北一段微斜路就見到路口同一塊指示牌，呢個時候discman乙部播放嘅歌曲Dry Kill Logic《Goodnight》唱埋最後一句「I guess it's best we say goodnight」都完咗喇，屌你咩goodnight啫good morning唔得嘅咩明明天光冇耐屌那媽即係串鳩我啫？不過《Goodnight》完結即係代表由地鐵站B出口行上黎路口指示牌約4分鐘多鐘。跟住就如路口指示牌方向一直走，一直走到去城門谷游泳池門口。
第五回之地獄城門谷運動場首關 -城門谷游泳池門口
走到去城門谷游泳池門口，有兩條路你揀，先選A計劃，即係經公園前往地獄城門谷運動場，呢個時候discman乙部播放緊另一首歌曲《What Comes Around》，由美國拉丁新金屬樂隊Ill Niño主唱，首歌一開始第一句就係「I Hate You... x2」，然後就係用沙聲哮出「Shut Up ！x2」真係同個場合九唔搭八，總知帶《十二隻恐龍去野餐》原聲大碟黎好過。
第六回之地獄城門谷運動場二關 -行不完的公園
進入公園，一直行前就冇問題，其他嘢擋係WFC得架喇。咦，行行吓見到捕快，仲望住我添，好驚呀媽咪，不過正所謂『平生不作虧心事 夜半敲門也不驚』，良好市民一名未驚過。不過話時話呢個公園唔細，不過吸煙嘅人切勿喺到吸煙呀，公園係全面禁煙嘅，只要你一違法，控煙辦就會喺水池底浮上黎、樹上跳落黎、地底爆出黎捉鳩你，記住唔好呀。
如果唔熟悉啲路，公園內好多指示牌，清楚列明地獄谷運動場方向。去到呢個牌前，《What Comes Around》播完，差唔多4分鐘。緊接嘅係美國新金屬Otep《Confrontation》，控訴類型歌曲，一路上聽住來來去去嘅幾句：
『Stand up, speak out, strike back/Stand up, speak out, strike back
They don't know what they started/Confrontation』
同個場合九唔搭八嘅歌曲洗禮下，行不完的公園終於行完。
第七回之地獄城門谷運動場終極關 - 死亡天梯
穿過公園終於望到地獄門谷運動場，心情真係好激動，差啲當場痛哭。在穿過石地球場，終極一關就在眼前，死亡天梯。所謂死亡天梯，咪又係我鳩作出黎，咪又係樓梯一條。不過本來喺我身後嘅阿伯居然反超我而且上梯速度極快！喂阿伯等埋我呀！喂阿伯你跌咗錢呀快啲返黎執呀！
第八回之地獄城門谷運動場 -成功闖入地獄
終於到達地獄門谷運動場門口，古有林投姐由陰間返陽救子，現有我由陽間勇闖地獄谷唔知為乜。《Confrontation》播完，啱啱好5分鐘，《Goodnight》嘅4分多鐘 + 《What Comes Around》嘅差唔多4分鐘 + 《Confrontation》5分鐘，加埋企喺到影呢影路，望望隻鏢，8點32分，8點15分出發，即係15分鐘多啲啲，減返影呢影路嘅2分鐘即係15分鐘，在加喺地鐵站行上去，約20分鐘，行快啲相信可以15分鐘內到。
第九回之第二條路 -B計劃
因為想證實由地鐵站行上去A路定B路快啲，我在落去地鐵站門口在試多次，8點39分落到去地鐵站門口，休息一分鐘8點40分在行上去，B計劃點行？就係去到城門谷游泳池門口唔好入去直上，個條屬於斜斜地嘅山路要上斜，叫城門道，沿住條路係咁行行去到停車場出入口位轉入去在行條落斜嘅路就到，我只係用咗12分鐘就完成，我踩到狗屎洗咗分幾鐘，正常大約10分鐘內到，計埋地鐵站行上去，B計劃快5分鐘到，不過呢度啲路窄小心睇車，亦唔建議行，正所謂上山難，快又點，都濕透了。
第十回之歸位返陽
點解咁無聊玩真人大測試？因為城門谷運動場近日內部維修趕火中，有啲喺天花新裝嘅嘢要油，數量唔少，所以有人問有冇興趣插隻腳入黎玩吓？咁當然要實地去考察啦，還掂都係咪考察埋路程，不過價錢傾唔掂未能成事，不過算啦總算冇白行一躺。
外傳 - 免費睇波位置
於城門道一直往前走有個位置可以睇到免費波，不過小心睇睇吓俾車撞落山呀。
外傳 - 行到爆褲
因為考察路程所以行到褲都爆埋，鞋未爛褲先爆，問你死味。
