極端WFC之SAFF Championship(南亞足球國家盃)今屆由尼泊爾主辦，舉行日期係今個月月底。足球喺南亞地區發展唔係太好，主要係南亞地區唔太流行足球，當中尼泊爾算係其中之一熱愛足球嘅南亞國家，但尼泊爾仍然未有任何職業體育運動存在，比較熱門嘅足球只算半職業，儘管尼泊爾算係流行足球，但實力喺南亞地區一直都唔係最強，由1993年首屆南亞盃計起，尼泊爾未嘗冠亞軍滋味，今次係繼97後在次喺尼泊爾舉行南亞盃，尼泊爾足總當然希望成績有所突破。
不過至今尼泊爾足球實力依然參差，以早前亞挑盃為例，0比2不敵孟加拉突顯尼泊爾普遍球員技術有限，大部分球員速度有返咁上吓，拎咗個波就鳩衝，的確係好快，但卻唔係幾知拎咗個波點做其實都係冇用嘅，就算最尾一場打和咗巴勒斯坦都唔可以代表什麼，睇完亞挑盃明白點解尼泊爾喺國際賽可以多場不勝，不過長路漫漫，急唔到。
今次尼泊爾選咗25名球員入伍，只有1人喺外地揾食，佢就係踢後中前都得嘅尼泊爾超人Rohit Chand(查特)，現時效力印尼嘅佩斯查，之前同林學曦係同房室友，兩個晚晚玩手指抱住喺張單人床一齊訓(只係我幻想唔係真架)。查特基本上除咗守門員之外咩位都打得，喺尼泊爾比較打得後啲，喺印尼多數就喺中間揾食，間中客串前鋒，雖然查特只有21歲，但已經去過兩個地方外流，係尼泊爾國家隊不可或缺嘅一員。
除咗查特，Sagar Thapa(特柏)、Biraj Maharjan(馬哈爾)、Sandip Rai(辛特拉)、Raju Tamang(達芒)、Santosh Sahukhala(沙亨哈那)、Anil Gurung(古蘭)等經驗豐富嘅球員都有入選，今次尼泊爾小組對手有印度、孟加拉及巴基斯坦，首名及次名出線，印度嘅實力稍稍超班，孟加拉年初作客贏過尼泊爾，不過尼泊爾喺2011年南亞盃贏過孟加拉，對此尼泊爾球迷對出線形勢都比較樂觀，但切勿忽視巴基斯坦，我認為尼泊爾、孟加拉、巴基斯坦嘅實力並非相差太遠，呢組會好刺激。
雖然尼泊爾國家隊實力參差(比台灣稍弱)，但佢地有啲球迷值得尊敬，2014世界盃外圍賽，尼泊爾國家隊先以0比9作客不敵約旦國家隊，但次回合返到主場，部分球迷冇受國家隊大比數落敗影響，約12,000人爭先湧入加德滿都主場繼續聲援尼泊爾，最後尼泊爾更成功迫和約旦。
没有评论:
发表评论