昨日有多場青年聯賽舉行，喺粉嶺遊樂場就有兩場U16精英碟D組比賽，頭場由九龍木球會對西貢，顧名思義，九龍木球會係一個推廣木球運動嘅組織，但今日發展至有足球隊嘅地步，隊中球員大部分都係洋青及印巴青年，而西貢U16即係西貢區體育會搞嘅青年隊，以華人為主。木球會U16喺今年青年界比賽未嘗一敗，實力唔錯，所以一開波已經壓住西貢黎打，論技術，木球會比較好，組織雖然唔太流暢，但勝在贏身型及體力，好多時埋身搶搏期間，西貢球員都係處於下風，雖然只係U16嘅比賽，但唔少木球會球員甚至比我高，我由中三後就停止長高，至今都係得果一米七四，睇到呢到見到有架九巴喺出面馬路駛緊過黎，真係有啲衝動想衝出馬路，不過當然只係鳩想吓啫。說回比賽，西貢今場自知實力處下風，所以以守為主，一有反擊機會就大腳斬前在配以前鋒高速優勢去尋求機會，雖然大部分機會都把握唔住，但佢地可以做嘅就係呢樣嘢。上半場，射門次數超過10次嘅木球會領先1比0。下半場木球會依然盡佔上風，而面對木球會前場嘅處處壓迫，西貢防守顯得有點吃力及混亂，有段時間西貢半場都過唔到，後場傳送亦多次被截斷形成對方攻勢，幸好喺最後嘅時刻西貢球員可以力挽狂瀾。不過久守必失，完場前木球會都係入多球，最後木球會2比0小勝西貢。
【青年聯賽有時比丙丁聯賽更為刺激？】
雖然只係一場平平無奇冇關注度嘅青年聯賽，但雙方喺場上爭搶還是比我想像要激烈，我相信答案只有一個，就係大家都想贏，有邊個係希望自己會輸？冇幾多個，所以我有時會覺得，一啲青年聯賽可能比一啲丙丁聯賽喺場面上更為刺激，雖然有啲青年球員技術上仲有好多進步空間，但係呢班仍在求學中嘅小朋友，個心冇大人咁多束縛及煩惱，佢地可能單純得只希望贏，而踢丙丁聯賽嘅球員，大部分身兼正職，喺要揾食嘅情況底下，丙丁聯賽對佢地而言，可能只係一種工餘娛樂活動，因為仲要揾食，所以就算可以去盡啲亦可能會有啲就住，所以青年聯賽與甲組對下嘅三個級別業餘聯賽，從來都係兩回事，從來都係冇可能比較。
【 [谷德昭]你哋咪咁啦，我想食嘢呀！[/谷德昭] 】
之後將會上演『貝鈞奇打吡』公民東區對九菓，點解叫『貝鈞奇打吡』？因為兩隊主席都係貝鈞奇囉。由於仲有半小時先打，所以就去隔離嘅粉嶺名都揾啲嘢填吓肚，見到肯德基打蛇餅打到就黎到隔咗幾個鋪位嘅麥當勞，真係嚇死我喇，最怕排隊，寧願唔食肯德基啲頹飯去對面麵包店買個頹包好過，點知麵包店都收工，咩吉野家、麥當勞、大家樂我又唔想食，行遠少少有間海皇，行到去又見打蛇餅，[谷德昭]你哋咪咁啦，我想食嘢呀！[/谷德昭]，粉嶺幾時多咗咁多人架？不過火車站呢一頭又真係冇乜好選擇，好多都係連鎖大集團嘅快餐店，得返間德興茶餐廳，以前有間上海嘢喺呢度又經濟又好食，不過小本經營又點敵得過大財團？如果唔係趕時間我會過去對面粉嶺中心樓下揾嘢食好過，想要食Pizza去芝脆雞囉，呢度啲Pizza又唔算太昂貴又好食過一啲專門店，又可以去大家樂個親戚大眾樂食個家常便飯，不過行得黎都夠鐘，最後我都係乜都冇買走返去粉嶺遊樂場算喇肚餓咪去廁所飲水喉水算囉，見到8點半場中得公民東區球員都知咩事，之後球證吹雞，比賽腰斬，餘下時間變成公民球員與朋友教練嘅練習賽，即係如果我話俾20蚊跟隊都有可能可以踢埋一份。
没有评论:
发表评论