失波或者做唔好，咪再做過，唔需要下下要比說話隊友聽。一黎於事無補，二黎好打擊隊友自信心。我曾有個萬事怨嘅隊友，每次失波都會埋怨隊友不濟，甚至會無心機踢波。雖然佢係好好波，但係從來無人喜歡同佢踢，因為佢唔識得體諒同埋鼓勵。
失波，鼓勵一句，總比埋怨一句好。呢啲唔係叫放縱，而係俾信心佢。你對佢無信心，咁何來踢得出好波？為什麼有時候弱隊面對強隊，明明實力差距甚大都可以同對方打成均勢？因為場上十一個人都好團結好齊心，你補我我補你，最重要係大家失波或交失波唔會怨而係鼓勵一聲：
｢加油，下次做好啲！｣
「加油，xxx！ 」
「唔緊要，再做過！」
｢頂住，唔好氣餒！｣
「xxx, 好波！」
有時候，踢波，唔單止講技術，仲有講你隊波係咪一條心！
我明白好辛苦先做到一個攻勢但輕易被截斷個種氣憤感受，但喺失波並非眾人所想，如其怨，倒不如大家多留一口氣幫手回防，因為波係十一個人一齊踢，要互相補位，互補不足。有啲人認為錯就要話，其實我都認同，但唔係即場發脾氣俾說話佢聽，而係完場話番佢知應該要點樣做。
踢波，要踢得認真，但最重要係大家都享受踢波既過程。你想踢得開心，其實一句鼓勵，一句加油，就已經足夠。踢波，多一點鼓勵，少一點埋怨，咁樣大家先會踢得出好波，咁樣先會齊心，而大家亦會好享受成個過程，就算輸，都會覺得輸得快樂，因為大家享受。唔止球迷要同球隊共甘苦，場上十一個人亦然，因為團結就是能夠擊敗對手的最佳戰術！
懂得鼓勵隊友，不論你球技好與壞，你也會是一個好隊友！
没有评论:
发表评论