由細到大，我都好鍾意食零食，乜嘢旺旺啊、味覺糖啊、媽咪麵啊，統統都係小息放學嘅主要食糧。當中有一款係我到而家依然容易唔記得，但又曾經食過嘅，就係明治嘅欣欣杯喇。
前幾日樓下商場搞咗每月一度嘅四洲小型食品展，見到一堆優惠零食，無意中响芸芸零食裡面，畀我搵到欣欣杯。之後一幕幕同欣欣杯相關嘅回憶，從腦海裡面浮返哂上嚟。
相信好多九十後都曾經食過欣欣杯。雖然好好食，但係又真係唔平，當時一杯都已經賣五蚊樓上（相比之下，卡樂B薯片賣兩三蚊），以我小學嗰陣每日十蚊零用錢（鬼叫我窮咩？）嚟講，真係好甘，不過間唔中買嚟體驗吓，嗰種點嚟點去嘅感覺都唔錯嘅。
所謂嘅「點嚟點去」，就係攞住一條條餅乾條去點杯內另一邊嘅醬料，呢個係欣欣杯嘅一大賣點。之但係最衰嘅，就係啲醬料少得好可憐，依著平時點麥樂雞嘅力去點欣欣杯嘅醬料，真係未到第五條都已經差唔多無哂咁滯。我真係想搵發明欣欣杯嘅蛋散，然後打佢一鑊。
我最鍾意就係朱古力味，幾乎買親都揀呢款口味。我記得除咗朱古力味，士多啤梨味亦好受歡迎，存貨最多嘅都係佢，直到而家。至於其他口味，包括呍呢嗱味，就好似好少見，如果無留意嘅話，重以為欣欣杯得兩款咁Dry。
唔好睇小佢個杯，原來除咗愛嚟裝餅乾條之外，重可以有其他用途。有朋友同我講，食完之後用嚟做水杯，但係奈何當時我細細個諗唔通，食完之後抌咗就算。近排更加有學生利用欣欣杯，組團搞咗「欣欣杯音樂會」，認真有創意。
縱使而家大個咗，時間唔多，忙完呢樣又要忙嗰樣，根本無乜時間食，回憶返以前得閒就嘆嘅時代，真係令人回味無窮。不過食還食，都係唔好食太多，食到肥咗就唔好喇。
（原文刊於此）
没有评论:
发表评论