《如果輪迴能選擇…做隻貓，做隻狗，定做港人？》
終於都過完年，又可以肆無忌憚的講D大吉利是野，我一路都好想講下輪迴呢件事。
我一直覺得「死左輪迴」呢個制度好systematic，將你一世做過的事全面積分化，量化咁計算你下世去邊，做咩，有咩結果。
我以前一直都有一個疑問，如果呢個世界有輪迴，點解全球人口數字會上升？如果個世界一開始有1000人，死左有得輪迴，咁點解個世界唔係永遠keep 住得1000人。後來，我有個好醒的朋友解答左我呢個問題：「個世界人口會增加，係因為有D 動物會輪迴做左人，你都見呢個世界愈來愈多瀕臨絕種動物啦。」佢咁講完，我再確定輪迴好合理。
先幾日過年我睇新聞，又見到鄺美雲隻愛犬Cash 出來同大家拜年，令我又再次諗起輪迴呢件事。如果人做好事下世有得keep 住做人，做壞事下世要做動物，咁鄺美雲隻Cash輪迴個條數係點計出來？到底佢上世係唔係做左100單好野，但又做左100單壞事，介乎於好人與壞人中間，所以今世佢有得住得舒適，食得招積，但就係要活係動物的軀殼入面。
單單Cash個名，就知佢家底唔錯，我印象中，有錢人D 狗先會改英文名，我以前識得的動物sss 都是用中文名，例如街口生果檔的旺財，學校隻小白，徐同學隻黑貓「徐黑」。Cash 其實都有招財的寓意，只是窮人會叫帶金，有錢人就會叫Cash。
到底10歲的Cash住得有幾舒適，食得有幾招積呢？
事業方面，得到鄺美雲的栽培下，Cash 贏在起跑線上，兩歲就成為專業人士，現職動物醫生，事業有成。愛情方面，Cash 的婚姻生活美滿，09年舉行大婚，迎娶門當戶對的靚老婆Sa Sa，Cash 的外母就係雞汁May姐，馮美基，佢地仲生左5胞胎添。食住方面當然講究，Cash 家住深水灣大宅，豪宅地段，風涼水冷。外母係May姐，當然日日有食神啦，報紙寫Cash 係食鮑魚同鵝肝補身的。Cash仲有皈依佛教，有哂心靈寄託。
睇完Cash 的生活，撞鬼囉，我竟然會真心的去羨慕Cash。諗深一層，係香港生活，想成為專業人士，舉行大婚組織家庭，買層深水灣豪宅，食鮑魚補身，成個package 對於打工仔來說，真係impossible。想簡簡單單，儲個首期買個瓦遮頭，都好有難度，我點會唔羨慕Cash呢。
如果輪迴能選擇，比你揀多次，會想做住劏房，日做n 小時的香港人；定係住得舒適，做狗出色的Cash呢？真係人生交叉點，好難揀。(星期日的晚上，仲有幾個鐘我又係office 喇，呢刻我係幾咁羨慕Cash 呢！)
PS. 我其實仲有一個疑問，Cash 皈依佛教，但點解又可以係教堂舉行大婚？哈哈哈哈。我問下架渣，Cash 唔好嬲，祝你生活美滿，日日有食神！
原文載於「姐死姐還在」Facebook 專頁：
http://www.facebook.com/photo.php?fbid=205918146283199&set=a.16470152373...
没有评论:
发表评论