毒撚一個，情人節有乜搞？去北區運動場一邊彈結他一邊流住眼淚唱「其實毒撚一個更開心，洗撚你講」兼睇埋精英盃及精英碟？雖然真係有諗過去坐吓，但最後都係冇去，不如喺呢度講吓星期三晚舉行嘅乙組聯賽大戰大埔對港會仲好喇。
今個月嘅盲撐行動非常順利，睇咗兩場國際青年賽(香港U16 vs 老撾U16/香港U16 vs 中國U16)，一場甲組(元朗 vs 橫濱FC香港)，一場半丁組(福建 vs 瑞聯/西貢 vs 離島)以及一場足總盃賽事(公民 vs 天旭)，只差乙丙組就完成每月盲撐計劃，難得大埔對港會喺周中晚上於廣福舉行，當然要去啦。
坐巴士去到廣福已經8點幾，本來諗住早啲去大埔墟華輝毒自食過常餐，但時間唔夠，於是乎喺油站買條媽媽腸搭包2個半嘅檸檬茶算，呢個廣福油站隔離果個巴士站對我黎說好熟悉，想當年每週最少兩次喺九龍城飲完嘢坐巴士去大埔轉車，廣福就係第一站，有時架巴士搖到我冇事變有事，一到廣福就衝去油站嘔，嘔唔切就直投衝去油站隔離果個發電機房角落頭望住個球場黎嘔，所以對呢度我係唔會陌生。
去到嘅時候已經落緊雨，但我將把遮留咗喺巴士到，球場裡面差唔多座無虛席，要企咁滯，因為冇遮用所以本身我企咗喺天橋睇懶得過去，企喺天橋望住個球場呢個舉動唔知係咪太可疑喇，結果俾阿Sir查身分證，阿Sir問點解唔入去睇呀？我就話等啲雨細啲先啦，原來阿Sir都知道有大埔呢支球隊存在不過就唔知大埔喺乙組，對於一個唔睇香港波嘅人而言居然知道呢場波其中一隊係大埔，我真係好感動，真係第一次俾阿Sir逗逗到差啲感動流淚。
講返場波，雙方你來我往，不相伯仲，各有機會，但係偏偏把握唔到，雖然大埔有唔少甲組腳，但港會嘅殺傷戰術不可看少，10打10之下互無紀錄，現時黃大仙以33分2分之差力壓大埔，不過由於足總PS咗甲組嘅愉園及屯門，所以今季乙組變成擁有兩個升班名額，但合唔合資格批唔批你打真係知碌鳩喇。
没有评论:
发表评论