陣容鼎盛，能不參加嗎？
且說早前拙文已論及一堆教育界潛藏的親中組織，早前又收到香港通識教育協會講座宣傳，題為「普選之路：停步？邁步？」，嘉賓陣容鼎盛，不容有失報名參加。
研討會由香港通識教育協會和「香港新動力」主辦，前者早前文章已有提及，是親中的「新一代文化協會」屬會，「新一代」宗旨其中之一為「倡導並創造條件讓青年學生認識、關心祖國，感悟、宏揚中國文化，藉此培養青年人對國家民族的歸屬感和責任感」；至於「香港新動力」倒是第一次聽，會上派發單張講該會是「帶領青年共同參與社會，建設香港，貢獻祖國」，亦會搞「政治人才培訓班，務求為有志參政、議政、論政的青年朋友提供培訓」的智庫組織。
到了會場，禮堂中其實劃分了位置，分有「第一組」至「第八組」的座位，當時百思不解，及後又看見「公眾報名」的位置，原來是次講座既為「研討會」，亦為「香港教師重慶團出發前聚會」，大抵主辦單位怕無人黎，所以要兼搞聚會充撐場面…事實上諾大可容納310人的禮堂，最終只有嘉賓十餘人、公眾報名十餘人，但重慶團友卻足有近七十人，貽笑大方。
組聚：香港教師重慶團出發前聚會
左起：劉江華（政制乃內地事務局局長）、劉世蒼副校長（香港通識教育協會主席）、周融（幫港出聲發起人）
早已預料無咩特別，但選擇晨早十點聽講座，還是希望有那麼一點特別。不過坐兩個鐘，還是後悔無訓多兩個鐘。劉江華老油條，皮笑肉不笑咁由「歷史、憲制、政治」三點講解，由委任港督時無人有訴求話要選，到回歸後由選舉委員會間選走向一人一票直選，統統歸功於基本法。
「以前中英聯合聲明都係話由選舉或者協商產生，都無講要普選。其實普選嘅法理基礎係基本法同埋2007年人大常委嘅決定。基本法係當年草委會傾咗4年08個月決議，所以係1990年4月4日頒佈時都受到市民大概認同。」
之後就交代返憲制上立法步驟，同埋特區政府已透過安排議員與中聯辦交流、林鄭晚宴、上政黨解釋同訪滬等釋出善意，廣泛諮詢。一切「希望有商有量」，「過唔到就政制原踏步」。講完，一輪官腔，意料之中。
反而周融不愧係傳媒人，用大量比喻同語言偽術，引導人支持其講法。而且佢選擇企起身行到場中間講，語調豐富，比皮笑肉不笑的老油條劉江華更引人注目。半小時分享，都圍繞住和平有商有量，實際係反佔中：
「2005年政改停步，我地失望，但無實際損失；但今日唔同，我地過唔到就會有佔中，就會動亂。大家睇下台灣、泰國，我地係咪想咁樣？所以我地只有邁進。
呢種漠視背後各種政治社會同文化因素嘅比喻，將佔中喻為台灣同泰國的問題，區區當然齒冷，但在座竟然好多人點頭認同。繼續講落去，就係將佔中講成暴亂、恐嚇，係「攻擊別人、打別人」，呼籲市民SEND E-MAIL俾泛民議員，表達唔想佔中云云。總結扣緊返在座老師，話「不要將憤怒同痛恨放入小朋友同年輕人腦袋，使青少年變成只識痛恨嘅人」、「各位老師係第一行前線，亦係最後防線」。最後竟然將佔中指為「睇下阿爾蓋達、以色列、巴基斯坦」，「唔好俾仇恨掩蓋愛與和平」。真係令好多指責佔中太溫吞唔知做緊乜嘅基進泛民朋友情何以堪。
及後半小時提問環節，都係沉悶收場。基本上無乜火花，只係問周融1,600人提委會方案、點解一定要2017唔可以等2022、2027、特區政府如何處理挑戰法律嘅佔中人士保障市民等等。唯一係區區問一條愛國愛港問題，斥責中央搬龍門，已經令在座其他人側目。當然轉頭劉江華就一個太極耍走了，意料之中。
其實成個研討會講過乜？就係耍官腔同官腔。但總有人係被呢啲官腔活動影響咗，從而相信政府立場反對民間運動。周融後尾被問及係唔係所有群眾運動都係唔啱？
「其實好多時候睇你嘅理念啱唔啱，成功嘅就係成功嘅公民運動，不成功嘅其實本身就唔可以成功，因為你嘅理念不正確。好多人以為自己係正確係正義係啱晒，但只有成功先可以證明你係啱嘅先證明你嘅理念正確。」
呢種成王敗寇卻變成是否正確嘅語言偽術，會上周融講咗幾次。見在席公眾頻頻點頭，我真係被佢地吹到啤一聲。
親中統戰組織嘅工作已完成，劉江華急步離開，周融同支持者合照，重慶團開始聚會。區區離開會場，門外旁沱大雨，天色陰沉。慨嘆無花生食，後悔無訓多兩個鐘，黯然歸家。
有商有量宣傳單張，「提名委員會提名」
没有评论:
发表评论