眾所周知，徵文比賽喺香港文學生態扮演重要嘅地位。年輕寫作人想打響名堂，最常見嘅方法係參加徵文比賽，攞到獎，跟住再出書，呢啲例子俯拾皆是。調轉頭諗，搞徵文比賽都會影響到香港嘅文學生態。
一般黎講，香港大大小小唔同嘅徵文比賽，例如青年文學獎、城市文學創作獎等，題材、寫法都相當自由。不過今日網絡文學興起，我地比較之下，漸漸都會見到徵文比賽作品同網絡文章最大嘅分別：廣東話係不得內進。
廣東話與粗口，華人與狗
我上網打「廣東話 徵文比賽」諗住搵啲資料，以為口語創作呢啲咁容易嘅題材，實有人搞過類似比賽。誰不知廣東話徵文比賽就搵唔到，反而見到一般徵文比賽都有啲好有趣嘅規則:
「2. 文體：敘事文、抒情文或故事創作（不接受廣東話口語或粗俗俚語）」
「(F) 參賽作品必須是以中文創作之語體文（不接受廣東話創作、或粗俗俚語）」
有趣嘅係，呢啲比賽都必然會將廣東話同粗口並列。令我諗起歧視華人嘅「華人與狗不得入內」嘅標語。粗口唔能夠入文，因為佢唔文雅，呢層大家都可以理解。然而口語又唔文雅咩？咁點解北方「啥兒幹什忽悠」可以入文，而廣東話嘅的士都駛唔入文章，要改成「出租車」方可通行？
我手寫佢口，南手寫北口
事實上係，我地鄙視自己嘅語言。人地用口語寫入文學，我地就以為北方話最粗鄙嘅字都係「文藝的語言」，而廣東話嘅雅字，一文兩文都要拒於門外，變成一塊兩塊。大陸、台灣嘅國語、普通話推廣，逐漸感染我地，使我地對自己嘅母語自卑。學校「口語入文」越捉越緊，而年青作家嘅文章越多見「西紅柿」、「魚肉丸子」等。
中史書都有教，白話文由五四運動開始，「我手寫我口」、「我手寫我心」呢啲口號深入每個市民嘅腦海。不過傳到黎南方，再傳到黎香港，就好不倫不類。一方面俾人鬧「香港學生詞彙貧乏」，另一方面無論閉翳、喊苦喊忽、心思思定係心掛掛都唔俾人寫，逼你用另一套詞彙。既然係「我手寫我口」，「我手寫我心」，咁點解我地諗嘢、講嘢都係用廣東話，落到紙上係用書面語呢？如果真係承傳五四運動嘅精神，點解我地到今時今日仲係「我手寫佢口」、南手寫北口？白話文嘅敢於書寫嘅精神，香港根本時至今日仲未做到。
忠於自己 振與文學
先前寫咗篇〈振興香港文學：解除書面語封印！〉，已經講過。成日俾人話年輕作品千篇一律，好似有無形嘅枷鎖束縛，我睇網絡文章千變萬化，發展迅速。成日話年輕作家無法發圍，出書都無人買無人睇，但網絡文章個個爭住拍片朗讀，潮文膾炙人口。網絡文章之所以流行，在於貼近我地嘅日常思考、生活，親切而感人。書檯隔離又無人揸枝槍指住你，原稿紙上任筆馳騁，點解我地要劃地自限，唔試下再進一步，用我地嘅思考語言做文學創作？
考語言做文學創作？
我地都知道，用廣東話參賽，甚至用廣東話寫作出書，要一個人冒險踏出第一步實在艱難。但我地掉轉頭，用廣東話搞徵文比賽，等大家參與掂啦掛。「為之，則難者亦易矣;不為，則易者亦難矣。」所以港語學搞「第一屆廣東話徵文比賽」，希望大家有文出文，幫手宣傳一下，作星星之火，使香港文學重新振作！
没有评论:
发表评论