話說前幾晚，跟平日久不久就傾中文流行音樂既朋友係FB吹水，由唔知無記今年點頒十首歌講到關淑怡可能憑陀飛輪入十大，再講到提議陳慧嫻快快手唱隻千千闕歌新版上勁歌，再嗡到不如叫劉小慧出黎唱急色鬼愛出位，然後大家共同想起，寶麗金當年都為各位歌手製作唔少特色西歌。
西歌是什麼？其實此定義因人而異，即例如今時今日你覺得食軟雪糕好正，我就覺得好西。然後突然一時興之所至，不如來個寶記西歌系列，好讓我等同期朋友懷緬當年樂壇，又可以讓新一代朋友認識當年西歌特別多。寶記的西歌，女歌手擁有特別多，於是，頭炮就係下年開個唱既小鳳姐！
我知，你認識小鳳姐一定係喜氣洋洋，亦覺得呢首幾西。不過睇埋落去，你會知道，原來小鳳姐有好多好歌係你未聽過，原來小鳳姐可以咁趣。
呢首我不會Mind，我當年聽到已經覺得：「喂大佬想點呀！」填詞人向雪懷先生呢首歌前段同後段完全無關係，當然果句無啦啦出現既我不會Mind同我點會Mind係精點所在啦！以上呢個竟然係亞視MV，係咪好珍貴先？
嫌第一首無料到？呢首自己人係咪正先？填詞又係向雪懷，同埋卡龍先生。廣東話，潮州話，國語，連亞肋路亞都有埋，最後呢句『獨個地跑步番深圳』真係好得。不過今時今日既香港，聽下呢隻歌，對於強國朋友，係咪有更深感受呢？
呢首係朋友提出，原因，竟然可以將一無所有改成咁。盧國沾先生既詞填成點，見仁見志啦，不過個人認為，當年填詞人質素真係有高低之分架。
好，以下幾首，mv就無喇，不過好好彩搵到MP3連歌詞，相信我既選擇，你唔會失望既！
先黎呢首：填詞人係林振強先生（！），歌名叫Hello Paula，唔好講咁多，真係要先聽聽先：
http://www.xiami.com/song/detail/id/153669
有理由相信呢首係為演唱會而寫既，但呢類Cult詞實在唔知講乜好，hello？
演唱會歌以上呢首你或者會話可以攪氣氛，咁，其實有首仲勁：歌名叫演唱花絮，填詞既前輩叫盧永強，不如睇幾句歌詞丫：
「我今晚請你地做探長，偵緝邊一個仲未拍掌，我要佢一起唱，誰違令罰他一碟辣椒醬」係咪好想聽呢？
http://www.xiami.com/song/detail/id/153645
小鳳姐唔知有冇係演唱會唱過呢？在場朋友唔知有乜反應呢？
仲有呢首：歌名叫打每一個電話，你會唔會估到佢想唱乜？陳少琪先生呢首相信應該inspired左之後達明既今天應該很高興，點解？好明顯係寫當年好多人移民，大家要打好多idd黎維繫感情啦！
http://www.xiami.com/song/detail/id/153463
其實，當年好多歌手唱廣東歌已經唔介意混入口語化架喇，只不過呢首歌話俾大家知，廣東歌，真係好多可能性架！打番個電話先！
最後獻上呢首，個人認為幾西，當年睇埋鵬哥著波點裙唱仲西，今次睇埋亞視呢個mv就西到爆，好，我地一齊夢飛行！
希望大家高興，咁，你估我下次寫邊個呢？
原文刊於此
没有评论:
发表评论