世界各地都有好多對足球充滿熱誠嘅女球迷，佢地未必係我地腦入面諗得咁膚淺，只係為咗睇靚仔。足球對佢地黎講係一種信仰，如南美球迷，會一家大細，男男女女，幾代同堂加入球會做會員一齊睇波。足球甚至可以話係佢地生命嘅一部份，主宰佢地嘅喜怒衷樂，贏波會開心，輸波會落淚，個份熱情唔會比其他男人輸蝕。
係外國，睇波唔係只係男人嘅活動，女人都可以樂在其中。鏡頭面前，女人嘅數目不會比男人少。土耳其曾經有場波，因為男球迷係上場搞事，被罰無得入場睇波。於是女球迷便請纓代男球迷「上陣」，成個球場五萬幾人，全部都係女球迷或婦孺。足球，不是男人浪漫，而係所有人的浪漫！然而，奇怪嘅係，係香港，男人總覺得足球同女人係兩種唔可以產生共嗚嘅野。
每當女人講起足球，男人總會有兩種反應。
第一種，係驚訝。
「哇，原來你識睇波架！？」
「估唔到你咁有內涵喎！」
就算明明你對面前呢個女人一啲興趣或者性幻想都無，但佢一講起足球，你會忽然覺得面前呢個女人好charm，好有內涵，甚至唔洗再深究落去都會覺得面前呢個會係個好女仔或者係好老婆。因為呢一刻，你唔再需要擔心同對方有無共同話題或者興趣。足球，自然地將你地兩條紅線慢慢勾埋一齊。
能夠係香港地遇上識睇波嘅女人，係一種天賜嘅緣份。
然而世上每一樣野都有佢嘅反面。呢一刻你可能覺得佢好有內涵，但你愈深究落去，就發現愈係唔對路，換黎嘅可能係第二種反應－反感。
「你識睇波架！？」
「係呀！我好中意美斯BB架。好高大，好大隻呀佢。」
高大？大隻？你究竟知唔知邊個叫美斯？定係你講個位美斯，其實係指張家輝？
「哦，係咩，哈哈。」
「美斯BB今年世界盃好勁呀，入咗好多波，但啲隊友好廢囉，都唔識踢波嘅。」
「哈哈，係呀係呀。」
「佢好似係踢.....巴....巴咩拿呀？」
「巴塞羅拿。」
「係呀係呀，巴塞羅拿。都係踢佢一個之嘛，啦，呢啲咪球皇囉！」
「哈哈。呀，你咁中意美斯，即係話你支持阿根廷啦？」
「阿根廷？唔係呀，我支持西班牙架。」
「西班牙？」
「美斯係西班牙踢波架嘛，緊係支持西班牙啦！」
其實當女人答成咁，你基本上唔需要再問落去，你知道再傾落去都無意思，因為佢可能連場波其實幾多個打幾多個都唔知。而佢嘅對答可以清楚話你知，佢根本唔識足球。
男人唔介意女人唔識足球，最介意你唔識足球扮識足球！
講番轉頭，男人最覺得女人唔應該同足球產生任何感情嘅原因，係在於佢地根本係醉翁之意不在酒。
「喂，呢個球員好靚仔呀！」
「係咩？好普通啫。」
「佢叫咩名呀？」
「講完你咪又係得個知字。」
「我要知呀，講我知啦。」
「XXX」
「好型好靚仔呀！」
幾分鐘過後。XXX被換出場。
「做咩呀？佢去邊呀？」
「踢得唔好咪比教練換走咗。」
「咩唔好呀？個教練識唔識野架！咁而家即係點呀？佢一陣會唔會有得出番場架？」
「無架啦。」
「咁下一場呢？」
「呢場決賽啦喎。」
男人覺得女人睇波不外乎都係集郵，當中入面個啲咩野戰術呀，咩野叫越位呀，個球員點樣好技術呀，WHO XXXX CARE'S？最重要面前個個球員究竟吸唔吸引。個個口中都只係識啲大牌明星，其他球員一個都唔識，但居然話自己好鐘意足球。尤其睇到TVB啲足球SHOW，叫班女上黎扮女球迷,但對答時明顯表現出佢根本平日都無睇波！正正因為咁，男人自然會覺得女人睇波根本曬鳩氣嘅事。就好似食放題，食黎食去都係熟食或者「碟頭飯」，一舊魚生都唔食，都唔知食黎做乜！
不過，不過，其實唔係個個女球迷都係我地男人想像中咁膚淺。事實香港仍然有不少對足球充滿熱誠嘅女球迷。有時候佢地會穿起波衫同男友或者家人一齊為自己支持嘅球隊打氣，甚至會身體力行落場踢番兩腳。呢一刻識唔識踢已經唔再係問題，重要嘅係足球係佢地眼中係一樣咩野。可能女球迷嘅足球知識同水平未必同男球迷咁廣闊，識晒各大聯賽有咩人，有咩球會呀歷史咁，但係佢地眼中，足球係一種運動，一種玩意，而唔係一種集郵或者Ｒ水吹嘅工具，至少佢地知道足球究竟係乜野一回事，唔會再答你美斯好大隻，問你Ｃ朗踢緊邊隊，答世界盃會係曼聯贏之類呢啲答案。
有時我會反思，點解香港嘅女仔總係唔可以好似外國球迷咁咁熱衷於足球？而男人又點解一方面好想搵個識睇波或者會陪你睇波嘅女友，但同時又會覺得「足球呢樣野，你地啲女人識條春？」後來我發現，原來係因為我地足球真係唔普及。
外國嘅足球發展大多數比香港完善，球迷投入程度一定比香港高，基本上入場睇波係每個星期嘅指定動作。當有國際賽時，佢地就更加興奮，因為自己國家亦會參與其中。支持，是常識吧？就好像奧運咁，你見到香港隊出賽你都會留意一下，甚至會默默為佢地打氣，情況一樣。但係香港，足球係好多人眼中只不過一種搵唔到食嘅職業。就算你唔係接觸開足球，都會知道香港足球有幾差，甚至會被潛移默化到覺得讀唔到書既人先會踢波。政府搞甲組聯賽，但搞啲唔搞啲。一方面好想普及足球，但一方面又乜都唔做。水平長時間內無法提高，球迷自己都唔支持自己地方嘅聯賽。國際賽就更加無份，咁嘅水平點出到線？香港地消閒活動多，仲點會身水身汗入場睇波？就算得閒，都唔會入啦？除非知名外隊訪港啫。
男球迷都唔投入本地足球，試問平時唔係睇開波嘅女球迷又會唔會去投入？平日已經少接觸，若果唔係世界盃呢啲盛事，每日被不同足球消息強姦耳朵，分分鐘呢一世都唔會接觸足球。
係呢個環境下，男球迷有男球迷睇英超；女人有女人繼續睇星星。當世界盃黎到，平日又無留意開，自然會鬧出邊個係XX？咩係越位？英格蘭係咪好勁呢啲問題出黎。而問親嘅，大多數係平時唔睇開波嘅女人，所以最後得出一個結論：女人根本唔識波。但呢個結論同時又好諷刺地講中男人嘅唏噓：「我都係想自己女朋友會陪自己睇波啫….」
有時好悲觀地諗，會唔會係得香港人先會覺得「足球係男人嘅浪漫，你地啲女人識條春咩！」錯嘅，唔係男球迷永遠覺得香港係唔會有女球迷出現；亦唔係女球迷永遠都唔去學識點睇足球；錯嘅就錯在香港呢個小小地方已經唔適合發展足球，甚至已經變到唔再適合我地居住。
然而，我地仍然甘願留守係呢個地方，唔係我地作賤，而係因為我地真係鐘意香港呢個地方。球迷都好想睇到香港足球可以進步；睇到香港足球可以普及；睇到香港足球可以打入世界盃決賽周，成為國際上一支勁旅；甚至睇到香港足球唔會再有黑哨出現，男男女女嘅球迷不分識波與否，一同站在球場上睇一場公平嘅比賽，一齊嗌住港隊口號，為港隊打氣。
足球，唔止係男人嘅浪漫，而係所有人嘅浪漫。
但呢種浪漫，香港人幾時先會學識？
没有评论:
发表评论