《參考電視劇角色著衫返工》
姐死姐還在page簡介有寫我任職大公司極小職員，引用陳鑑林式說法，我係香港一間「大嘅公司」做野嘅。咁我任職間公司到底有幾大呢？基本上月尾，公司出左份糧比我，我衣食住行都會「鼻毛可避」比返錢公司，形成完美嘅左手交右手「無天理」循環，咁我諗大家都知…個間公司架啦。
而每年暑假呢間大公司不費吹灰之力，都會吸引左好多應該係中左降頭嘅大學生黎做暑期工。今日又有一個入世未深嘅大學生來報到。佢當然係參考左TBB 《愛回家》個間史林廖賴律師事務所個D 律師嘅造型黎返工啦，真係好professional，而佢見到我地一身便服就問：點解你地係大公司做野都著得咁casual？⋯⋯
哈哈哈哈哈哈哈，我必須承認我有好賤格地笑佢，因為我冇諗過佢會問出口。我笑佢，因為我曾經都好值得被恥笑。我完全明白大家一定對「大嘅公司」有好多幻想，因為想當初我第一日返工，我心入面嘅background music 就係TBB 創世紀個首：「來給這世代留念 宇宙懷念，信心不斷 信念長存，讓我家園 心內作興建，那管多少辛酸 已獲勝算」，我當時諗，我仲唔係下個葉榮添，我發啦我。
我也有做暑期工嘅小時候，也有著很多很多的幻想：
- 係老鼠樂園做過暑期工，我幻想日日都進入「奇妙嘅世界」。但當我睇到白雪公主係後台講手提電話，同埋泰山冇搵條咸水草遮住重要部位，著返現代嘅牛仔褲，就一切幻想都幻滅哂。
- 大學3年班嘅暑假，去左電視台新聞部做暑期工，原來真係有坐台嘅男主播，上身著西裝，下身著波褲，真係九唔搭八得黎盡顯個性。所謂上半身官仔骨骨，下半身甩皮甩骨，大概就係咁。
大學畢業之後，我依然都係充滿幻想：
我第一份工係一間傳媒嘅記者，我必須要承認我真係好白痴，我覺得冇可能唔買返件今日睇真D 個隻，睇個樣有80%似避彈衣嘅記者背心，有左件背心我仲唔係一個完美嘅記者…
「係時候醒啦喂…」
今年暑假正好係我大學畢業3年，我冇再幻想可以成為葉榮添，每日行入公司首background music 已經轉左做黄伊汶嘅「心情仍然很爛…」，日日都會以界乎行乞與拎綜援之間嘅造型返工。開會見人我先會著返台底個pair 半腳踏實地高踭鞋，以及搽返來自X 那星嘅千頌E唇膏。我係好肉酸，但你話有咩爽得過，係台底除左鞋，一路做野，一路用左腳腳指R右腳腳背。見到D 暑期工仲未比呀姐玩殘，仿佛有支黃色螢光筆highlight 住佢地，我真係覺得「年少多好」。
PS. 其實返工著咩衫，係要根據「高踭鞋幾高都唔好高過呀姐」theory，高調得黎比呀姐低調就最perfect 池啦。
原載於姐死姐還在facebook 專頁：
https://www.facebook.com/164695310405483/photos/a.164701523738195.107374...
没有评论:
发表评论