按：作客足球帶大家出入香港各個球場，包括甲乙丙丁組賽事，報導場內外有趣同無聊的消息。作客足球，絕不抄襲，絕對原創。
今年香港甲組足球聯賽一共有十二隊球隊競逐，其中有三隊球隊係升班馬，分別係天行元朗、東方沙龍及愉園。而東方沙龍其中兩場主場賽事就移師到荃灣城門谷運動場，球隊總監梁守志就多次指編排有欠公平，令球隊在安排上有失預算。城門谷一直被指地方偏僻、交通不便及場地質素欠佳等。筆者昨日便專誠入場睇咗東方的首場賽事，個人就認為球場觀感不俗，而且睇波的角度亦比其他球場正！
之前有球迷就親身由大窩口港鐵站行去城門谷，我成世仔都未去過城門谷，原本諗住當行山咁都想效法下。但見到東方咁好服侍，最後都係選擇咗坐東方提供的免費接駁車。東方都算唔話得啦，分別係荃灣西及葵芳港鐵站安排咗旅遊巴，仲有十架咁多。結果我就同廿幾個球場阿叔坐同一架車上城門谷，車程途中更聽到佢地大談當年東方皇朝的威水史；由林尚義、譚拔士、希福特、李健和到譚兆偉等，如數家珍。我成日都話，即使在冰河時期仍然有呢班中堅份子撐起港甲，佢地對香港足球功不可沒呀。
今場波有成1154人入場，以新球場黎講算係咁啦。環境及睇波的角度都幾正，點解咁講？至少看台同球場既距離唔係好遠先啦，平時大埔、小西灣同青衣隔咗條跑道，真係要用望遠鏡睇波咁滯。仲有呀，城門谷最抵讚既就係兩邊升高o既看台設計，座位又有上蓋。入過旺角場都知啦，個上蓋唔防水咖嘛。唔知大家有無去過南區個主場香港仔運動場啦，幾枝鐵同電視直播升降台棟哂係度，點睇波呀大佬。城門谷唔止坐到5000 人, 大部分坐位既視野都唔太受阻。如果用座位黎計，城門谷仲好坐過旺角，至少鬆動啲呀。
嗱，我就唔係住荃灣區。不過老老實實啦，依加上網咁方便，搵架車去目的地唔係咁難呀。巴膠可以係旺角道搭32號去到總站落，再行3分鐘度就到啦。雖然九巴網頁就顯示32號係假日班次成19至25分鐘一班，但已經好方便啦。如果唔鍾意等，咪係大窩口港鐵出囉。如果行十幾分鐘都話遠，咁香港得番旺角場同青衣運動場啱大家去睇波，當做下運動啦！你估屯門鄧肇堅個場唔隔涉？大埔咪又係要由太和行餐飽先到。去完一次之後，依我睇，其實係球迷未習慣去城門谷啫！
喂，講番場波先，東方貴為上屆乙組亞軍，而且季前又打哂鑼咁，諗住超班咖嘛。不過就有啲啲失望啦。雖然憑住由南華加盟既伊達梅開二度，贏咗今季實力稍為褪色既屯門；但東方啲速率真係慢到得人驚，仲好似乙組啲衛生波咁。老將黃鎮宇就直頭跟唔到節奏，波都控到甩哂。東方今季仲簽咗基奧雲尼同比圖幾個巴西兵，但今場效果就一般啦。今季既屯門已經大不如前啦，東方都係險勝一球。「東方不敗」再唔係比賽節奏同組織上加把勁，無話南華同傑志啦，太陽飛馬都未必贏到呀！
不過話時話，我既兒時回憶姚學文都有上陣呀，雖然只係唔夠十分鐘，但都睇得出佢好博命。之前有報導話佢連消防員都唔做，全職踢番甲組，你都咪話唔熱血呀。你估話踢就踢咖，畢竟都成三十五歳啦，仲後生咩。係就係做開消防員打排球保持到體能，但始終英雄遲暮，同都係後備落場居多，但都為咗自己既夢想而放棄都叫高既薪同厚既職呀。學狂舞派話齋，你又為咗夢想可以去到幾盡先！
嗱，今次第一次同大家見面，醒個有趣既趣聞俾大家知下。太陽飛馬個左後衛鄧景煌原來改咗英文名呀，本來改個名就好小事，但今次就有啲唔同。鄧景煌係2006年由廣州嚟香港，加盟南華，數下數下都夠七年可以正式入籍。佢英文名由內地拼音改咗做英文拼音，唔知係咪因為本土派排蝗排得太厲害；所以就由 Deng Jinghuang 改咗做 Tang King Wong，做個正宗香港人，是否屬實就不得而啦。
没有评论:
发表评论