又有好多人話Ｄ人假結婚黎呃福利。
咁我以前在議辦做，好記得，有個成日來吹水的阿伯，返大陸娶了個女仔，我好奇，問佢，喂其實你年紀咁大做乜仲要搞咁多野呢？佢話，佢唔係為乜，「幾十歲都 『做』唔到D乜啦」，只不過單身寡佬幾十年，依家老，周身病，但無錢住私家老人院，更無錢請私人看護，而政府院舍又等到死都未上到，唯有返大陸搵個女人黎照顧自己，起碼病左有人call白車丫。
咁後來一路做，我，係見住一個又一個阿婆阿伯等政府院舍的case。呢D case好好做，因為好多根本唔合資格，即時叫佢過主就得。
(1) 年齡達65歲或以上*﹔
(2) 透過「安老服務統一評估機制」被評為適合入住護理安老院﹔
(3) 健康欠佳﹐或身體機能喪失或衰退﹐以致在個人照顧及起居活動方面需要別人提供協助﹔
(4) 可利用步行輔助器或輪椅走動﹔
(5) 沒有家屬可以提供必需的協助﹐或是照顧長者為家人帶來很大壓力﹔以及
(6) 精神狀態適合過群體生活。
健康欠佳﹐或身體機能喪失或衰退﹐以致在個人照顧及起居活動方面需要別人提供協助﹔ 但係又可以利用步行輔助器或輪椅走動。幾得意丫D條件。
而就算合資格，都平均係要等三年噃。
係。65歲或以上，健康欠佳﹐或身體機能喪失或衰退﹐以致在個人照顧及起居活動方面需要別人提供協助，等三年。
所以好多跟跟下就唔使跟。未等到就死的了。
一了百了。
咁又有個大陸女仔，仲要幾靚的，嫁了俾個阿伯，做兩份炒散，中間的時間日日扶住阿伯落街行公園。阿伯行動有點不便，但就成日笑口騎騎。我心諗，丫我老左有條咁既女日日扶我就過癮囉。咁我又口痕同個女仔講，你真係好，日日返工又咁好心機湊阿伯伯。佢話，我當初應承得黎，就知道佢無屋企人照顧；咁我話左黎到，就係會照顧佢。（嗰下我真係俾佢電親 ~.~）
呢D都係假結婚掛可能。婚姻可能係應該唔計兩個人因為彼此需要而共同生活，而只係屬於乾柴烈火晚晚啪啪啪的男女們。
就當我係講個別例子。但係老人無人照顧，絕非個別。
咁可能香港既窮等老人家，無政府照顧，無屋企人理既話，係應該快D早死早著。
這是香港的公平公義。好似係。
原圖見此。
没有评论:
发表评论