文：曾一心 (普教中學生關注組成員)
如果連廣東話都容納唔到，呢個仲係唔係我地所認識忌香港？
「屌，講呢尐，我討厭政治架。咪煩我咁多啦。」唔少睇緊CCTVB，聽緊普通話主題曲忌香港人可能會咁答我。
如果你都要係咁樣答我，我冇辦法。不過我想請你用返偉大祖國所提倡純正標準忌普通話去重新答我一次，「干，说这些。」
如果你仍然覺得自己用普通話表達會好過用廣東話忌話，咁你可以出返去上一頁，呢篇文唔係比你睇。如果你覺得「说这些」比起「講呢d」點都係多左一陣柒味的話，我希望你可以睇埋落去，一個關於我同你忌故事。
有一日我經過一間左校小學，聽到出面有幾個小朋友傾緊謁，我一開始聽唔明佢地講緊咩。我呆左一呆，再聽真尐，然後發現佢地唔係講緊廣東話，佢地講緊普通話。我細細聲「屌」左出黎，呢一刻，我覺得自己返左大陸。
究竟點解，而家香港忌小朋友，講忌會係普通話，而唔係我由細係香港聽到大、講到大忌廣東話？香港人唔係理所當然講廣東話架咩？究竟由幾時開始，一切本身係香港係理所當然忌事，會慢慢變為歷史？如果連廣東話都容納唔到，呢個仲係唔係我地所認識忌香港？
原來，一切都係由普教中開始。
係普教中計劃之中，以前我哋用廣東話諗詩、背誦忌日子將會係不久忌將來成為往事。以後香港小朋友一入到小學，上中文堂全部都要用普通話，日復日、年復年，佢地都要接受「普通話才是最好的、正確的中文」忌一套思維。佢哋會慢慢相信，講廣東話係低一級、係唔標準、係唔正確。日常生活中，佢哋會更多用普通話去溝通。一代代咁落去，好快，香港人將會將廣東話封印係歷史之中，再為佢加上一條「次等語言」忌罪名。矮化廣東話唔係遙遠忌事，今時今日，已經唔少學校慢慢推行普教中，教育局已經明目張膽咁話廣東話「不是法定語言」。但係，我希望諸位謹記，廣東話係香港人忌語言。我哋多年以黎講呢一套屬於我哋自己忌語言，用呢一套語言去孕育屬於香港自己忌文化。咁多年黎，我哋香港人一直用自己忌母語去學中文，一直行之有效，未見有大問題。唔好唔記得廣東話比普通話更接近古時用忌語言，而口語溝涌上忌普通話，亦非等同白話文。係呢個情況下，教育局憑咩去貶低廣東話？
廣東話係香港人忌語言，貶低廣東話，就係貶低我哋忌文化，就係貶低我地香港人。
今時今日香港而家愈黎愈唔似我哋忌家。我哋由土地、樓宇單位、鋪位，去到奶粉，由廉潔、自由去到公義、公正，係短短十六年間逐一被奪走。今日忌香港，已經千蒼百孔。而家要連自己忌語言都割讓埋出去？對唔住，我地實在玩唔起。今日我地接受左普教中，難保聽日接受埋國民教育，難保後日接受埋廿三條。香港人，如果你仍然希望自己仲可以係香港人，我懇求你哋，同我一齊，堅守香港每一條防線，堅決反對普教中，捍衛粵語。
聽到小朋友講普通話，令我覺得我身處大陸。究竟呢個係錯覺，定係我哋而家呢個城市，而家真係慢慢變成緊大陸？我固然希望係後者，但係究竟事實會係邊樣，係由我哋香港人忌行為決定。
香港人，如果你仍然希望自己仲可以係香港人，我懇求你哋，同我一齊，堅守香港每一條防線，堅決反對普教中，捍衛粵語。
没有评论:
发表评论