今朝上Facebook，我睇到黃之鋒今年考DSE；諗諗下，我考會考已經係9年前的事。各位睇緊呢篇文的人係唔係都突然發覺，中學離自己好遠，so sad。
黃之鋒尋日考完中文ORAL，佢係Facebook做左個ORAL 賽後分享。黃之鋒寫野，當然好好睇，我都成日睇，但其實黃之鋒Facebook 其他網友的comments 都好好睇。
黃之鋒考ORAL 前：
有考生係黃之鋒Facebook祈求唔好同佢一組，話「十條命也不夠死」。再有考生係街撞到黃之鋒表示擔心，確認黃之鋒考ORAL日期後，有人擔心到話「準備重考」；亦有人放下心頭大石話「早講，驚咁多日」。
黃之鋒到達考試現場：
黃子鋒上Facebook check in：「一入考場，個學校呀sir捉住我影相」
網友1：「我直接比5**你算啦」
網友2：要求教育局直播黃之鋒ORAL 考試
黃之鋒考完作賽後檢討：
網民緊急要求同黃之鋒同組組員速速現身分享感受；以及慰問同組組員，查詢有冇嚇到瀨屎？問有冇考完拎簽名？最後真係有黃之鋒同組組員現身留言，表示拜服黃之鋒。
成個ORAL直撃真的好精彩，個ORAL 直撃簡直喚醒了我9年前考會考的所有回憶。我睇完黃之鋒個ORAL 分享小貼士，同埋D 網友留言，我真心好欣賞呢班90後。佢地其實好有創意，直播黃之鋒考試都諗到。
你而家一定口響響：「驚咩鬼呀，考個ORAL 見到黃之鋒講到咁誇張」。你咁講，因為你老左啦。我真係好羨慕佢地仲會因為呢件小事而緊張同擔心，為考試而耿耿於懷呢件事，真的只有「青春，真可愛青春」的那些年才會發生。
會考考過D乜，我完全唔記得。我只記得，會考放榜個日，我有個同學係未派成績表個時，周圍安慰其他同學，佢話：「唔洗擔心喎，考衰左冇咩架，最多成世唔開心之嘛」。當時，我真係覺得呢條友好PK，我已經嚇到界乎瀨屎同瀨尿之間，仲講呢D；而家諗返起，真係好好笑。原來從前好在意的會考，而家竟然拋諸腦後。如果你今年考DSE，仲會緊張到有幾乎瀨屎的感覺，真的恭喜你，你應該好好珍惜呢D 難忘的青春回憶。
PS. 如果我同黃之鋒同組，我真的會好希望遇到個親中的marker。如果佢真係同我同組，我諗除左「金翅仆街鳥」同埋「I agree with you」之外，真的沒有其他野想講。(這只是我個人感想，如你遇上黃之鋒再好開心的應戰，我都好佩服你的)
圖片截自黃之鋒Facebook
原文轉載於姐死姐還在Facebook專頁
没有评论:
发表评论