相信每一間公司都會有極品同事。我轉工做老師之前係一個會計師，當年喺辦公室見證到靚女係幾咁恐怖。今日就同大家分享吓咩為之紅顏禍水啦。講明先，成件事幾複雜吓，如果想測試自己不妨唔好睇最尾一段，睇下自己估唔估得中哈哈。
先旨聲明啊吓，唔係個個靚女都有問題，我只想提提大家，唔好見到同事生得靚女就咩都肯制，否則就後悔莫及啦。講番正題，當年我大學畢業第一份工，就係做accountant。同年入職都有一位親密戰友，叫佢啊cherry啦，佢又係fresh grad，所以好鬼啱傾。
Cherry係典型極貪靚女仔，非常靚女，仲有170cm咁高，重點係佢好鐘意著短裙短褲show長腿。無錯啦，做會計嘅朋友都知道，其實accounting firm同departmant都係中年人話事，啲啊叔見到Cherry已經起哂港英旗敬禮，但啊姐們就暗地裡狂屌不已，十分眼紅。 聽聞佢intern已經成日咁著，但因為負責佢份appraisal嘅係男人，所以佢份CV都幾靚。
於是乎，喺冬天嘅某一日，佢著到鬼火咁靚咁番工，我仲好記得係 一條超緊身嘅黑白粗間條連身短裙，平時慣咗放直頭髮嘅佢，嗰日仲set到個頭靚一靚。當日一開工，男人哇哇聲，女人媽媽聲，佢自己就唔出聲。 由於我同佢比較熟，我就問佢：「咦，今晚同男仔出街啊？著到咁靚嘅？」Cherry聽完笑笑口，好姣咁話：「要教瞓吓啲唔聽話嘅人。」我心諗，咩料啊，瞓教定教訓啊？係咪想條仔精盡人亡當懲罰先？
誰 不 知！好戲在後頭，由Lunch time開始令人不安嘅事就連二連三咁發生。就喺大家對數對到隻狗咁嘅時候（Accountants食緊飯都要做嘢是常識吧），有人送咗紮花上嚟。收花者當然係我地嘅短裙美少女C小姐啦。咁例牌張卡係無寫送花人嘅名，但就耐人尋味咁寫咗句："Who deserves your kisses tonite? （邊個今晚咁好彩可以同妳錫錫先？）"
Wow，講到咁露骨，睇嚟都食硬Cherry所以一早插定旗啦。點知Cherry一收到花就板起塊臉話：「無聊。」之後大家問佢，吓，你今晚唔有約咩？佢好冷靜咁講咗句：「係有約，不過唔係同呢個人囉。」
唔係啊話，雖則話「兵仔最忌有自信，女神情歸都敏俊」，但試問又點估得到張卡上面嗰句"Who deserves your kisses tonite?"竟然真係一句疑問句呢？ 如是大家等到放工，睇吓會唔會有新消息啦。
正當大家都不抱期望之際，奇跡出現了！人事部嘅超新星，靚仔Vinus忽然現身會計部，全場濕度急升雨雪於上空凝聚。但著到好型仔嘅Vinus第一句對白就係：「行得未啊，姿整妹。」，仲要好Charm咁露齒笑，頂佢個肺。當然，姿整妹就係靚女Cherry啦。全場男女同事立即非常葡萄，但又無辦法唔承認，靚仔襯靚女，實在太登對了！
Vinus咁高調喺公司插旗，當晚Cherry亦罕見地up咗一張合照，仲打多一句耐人尋味嘅：「多希望你是我的另一半♥」吓，等陣先，咁都唔係另一半？唔係吓話！咁靚仔都要做兵？
最出奇嘅事喺第二日先發生。Cherry再次著得鬼火咁靚，條裙短已經唔係新鮮事，今次仲要讓半球添！Cherry依舊好風騷，不過問題就開始出現啦！
我地會計部嘅Department Head，人稱「激Sir」嘅大粒佬當日異常躁底，我同Cherry嘅工作量直逼Big4大公司。有一次我對錯數，激Sir好嬲咁講咗句：「你蠢到咁點讀大學架？請你嗰個癡線架？人事部啲人低能架？」
哇，喺Office講其他部門壞話係死罪，身經百戰嘅激Sir竟然衝口而出講啲咁嘅嘢。實在太奇怪啦。佢對Cherry就更奇怪，Cherry不嬲都做得好好，極少犯錯，即使突然有Extra工作都應對自如。但Cherry做得愈快，激Sir就分愈多嘢俾佢做。
直到OT嘅時候，激Sir特登唔放人，叫我地做埋文檔分類。跟手Cherry忍唔住喊，激Sir就大大聲鬧佢：「出街出得咁開心，有報應架！」
咦，喂！等陣先！唔係啊嘛，激Sir全日都針住Cherry嚟鬧，唔通係因為噚晚靚仔Vinus嘅事？等陣先，唔通送花嗰條蛋散就係激Sir？唔係啊話！佢結咗婚，個仔係我中學師弟嚟喎！
如果係真嘅，呢個女人實在太蠢啦……又要靚仔，又要上司，玩過火啦。今次好難收科喎！但係我實在係太睇少呢個短裙美少女，之後發生嘅事先係重點之中嘅重點！
當激Sir連續炮轟我地四個新人足足一星期之後，激Sir忽然回復正常。Cherry自從俾激Sir鬧完就再無著到咁靚，仲要著長褲勁密實。Cherry喺Facebook打咗好多奇怪嘅嘢，全部都關於咩自己俾最愛嘅人誤會之類啦……大家都諗緊，吓，靚仔Vinus做錯咩啊？
如是者到咗收工嘅時候，又有人送花上嚟。今次張卡又有新金句，我地一睇，真係笑到癡咗線！"Baby,stop screamin' tonite（bb，今晚唔好再發哂顛咁嗌啦。）" 咁，講到咁露骨，真係對自己好有自信咁喎！呢個時候，Cherry竟然同上次一樣，完全無反應，就當場將紮花放埋一邊，繼續做嘢。
就喺嗰日之後，Cherry每一日都收到花，卡上面嘅留言亦愈來愈奇怪。Vinus再無出現過，Cherry一於少理，繼續留低OT。而佢加班代表我都要加班，因為我地同期入職架啦，唔夠佢勤力就代表我懶。雖然博表現係好正常，但係點解激Sir每晚都陪我地加班呢？佢最高級架啦喎！
好快我就得到答案，有一晚激Sir行過嚟，讚我做得好好，仲開到聲叫我走。同時佢又話Cherry做錯嘢，叫佢繼續留低加班。無錯，唔駛柯南同金田一出動，連我都明哂。我終於知道發生咩事，真正嘅贏家唔係激Sir，當然都唔係Vinus，係Cherry！
如果Cherry真係塔上咗激Sir，咁我都變咗佢隻棋。因為佢知道我好需要呢份工（因為我要證明俾我女朋友睇我好努力），所以我一定會陪佢加班。佢特登搵後生靚仔嘅Vinus嚟刺激我地親愛嘅上司，激Sir之後開始情緒失控，日日鬧人仲搞到Cherry變番保守look。不過之後，激Sir每日送花，仲要焗住陪Cherry加班顯示誠意。因為我一定唔會早過Cherry走，所以今次忍唔住開聲叫我走嘅激Sir，就真真正正咁輸咗啦！而真正嘅提示，就係激Sir除咗戒指！
呢個年代仲有人玩送花，其實已經好老土。雖然真係好襯激Sir年紀，但係做到咁明顯，發現咩事嘅又點止我一個呢？其實辦公室最勁嘅一定女人，再真正醒目嘅女人，就唔會周圍講呢啲敏感嘢。不過，Cherry同激Sir嘅關係已經明顯到大家全體心照嘅地步，咁證明激Sir真係控制唔到自己。幾個月之後，有人收到風，激Sir竟然決定離婚！正當大家都諗呢個職場老江湖已經為情失守之際，女主角忽然喺Facebook公布自己同靚仔Vinus拍咗拖一個月。
即 係 話，其實我地啊頭激Sir先至係終極兵仔！睇到呢度，你一定喺度諗，咁做對Cherry有咩好處？新人喺Office搞咁多嘢，咪盞害死自己。你錯啦，聽聞激Sir賣咗其中一個單位，咁用嚟做咩就唔知啦，不過Cherry就花紅都唔要，仲突然辭職。無耐之後，連Vinus都俾佢飛埋。
最後激Sir無離到婚，不過就肯定少咗一個物業。Cherry就去咗另一間公司做公關。靚仔Vinus？邊有人理佢喎。
簡單啲嚟講，靚仔Vinus其實得兩個功能，一：引激Sir妒忌，二：Cherry收完錢之後，用嚟甩身嘅工具。送花嘅人應該一直都係激Sir，同時Cherry用靚仔Vinus嚟影響激Sir，令佢快啲賣咗層樓。激Sir食咗Cherry幾次，以為對方係認真，仲打算為咗佢同老婆離婚。不過收咗錢之後，Cherry就用Vinus嚟甩身，無耐之後仲分手兼轉埋工，激Sir無數追惟有呻笨同保住個家庭。好多人都話激Sir好蠢，做咗咁多年人爬到呢個位，都會俾個後生女呃到。其實男人幾多歲都貪戀美色，做傻事，又點止係年輕人嘅專利呢。所以，到底贏家係邊個？到底呢個故事講緊咩？大家心照啦。
【希望您將文章開心share給更多朋友:)】
【快啲去instagram搵 "jerry_sir"，快啲Follow我啦！】
没有评论:
发表评论