對唔住，呢篇文1999。
不過，我呢個moment真係好興奮，心情好難去平復，搭緊紅van都要打我嘅感受出嚟，所以各位，請體諒我嘅1999。
唔知大家知唔知，M記粟米批係乜東東嚟，但係對我嚟講，係非常有親切感，係難以磨滅嘅童年記憶。
記得喺我小學嗰陣，M記出左三款驚天地，泣鬼神嘅產品，一款係韓式烤餅，另一款係飯tastic，第三款一定係___批，當年佢出左芒果批，香芋批同粟米批，其中最迷倒我嘅，一定係粟米批。
我自細已經好鍾意食地門粟米蓉人地就會腐乳撈飯，而我就好鍾意粟米撈飯，而家去到我住宿舍，入倉嘅必須品一定有地門粟米蓉。
粟米同M記批呢個配搭真係世界級，冇得輸，鬆脆嘅外層，加埋甜甜嘅粟米蓉，食完真係嘩一聲，好鬼正，去到打緊字呢刻，我都好似細味緊個粟米批咁，甜絲絲
最重要最重要嘅係，佢係香港M記發展史上嘅一個謎，我問過身邊好多人，大家都好似唔知佢存在過咁樣。
曾經有朋友問我，M記最好食係咩？將軍漢堡？真膚淺。蘋果批？未算係最好食。咖哩漢堡？同食屎差唔多（我指個賣相）。我答粟米批，個個都目澄口呆望住我，個表情就好似知道梁振英唔講大話，曼聯唔踢英超，嚟香港踢港甲一樣樣。
我發覺有兩種M記產品，我身邊嘅人係冇印象，第一係粟米批，第二係粟米魚柳飯
大家淨係知道而家M記有飯食，但係完全唔知道M記14年前已經賣緊飯。我記得，2000年個書展，我同屋企人去行完通宵，去左M記食宵夜，我當時就去左食嗰個飯，同外面嘅粟米魚柳飯差唔多味。
大家去到呢度，可能會懷疑我點解做左M記打手，連14年前嘅嘢都咁清楚。我梗係清楚啦，因為佢係我有記憶以來，第一次腸胃炎呀嘛。我對M記一直以來都好有感受，除左小學做專題研究成日去食，10歲時喺安定M記開過生日會，我最深感受嘅，一定係M記粟米批。
今年粟米批重出江湖，我敢講，呢件一定係2014年最大嘅事，我咁多年以來最令我振奮嘅M記新聞。
Sorry for 1999 again。
没有评论:
发表评论