最近香港足總向屯門、愉園來個『一刀切』，取消咗呢兩支球會嘅參賽資格，以為此事可以就此告一段落？又唔係喎！咁做反而令唔少無辜球員今個球季在不能於甲組上場比賽，因為突如其來之『一刀切』，拖累咗其他球員，此舉引起唔少爭議，唔少球迷批評足總嘅決定及做法『有啲問題』。雖然香港足總嘅做法可能『有啲問題』，但足總搞嘅足球聯賽，還是要繼續看的，唔係撐足總，只係撐球員撐吓本地波而言。
今個月繼續『盲撐』活動，一口氣睇咗兩場國際青年賽、一場甲組、一場乙組、一場足總盃16強比賽、四場丁組及一場青年聯賽共十場比賽，甲、乙、丁都掂過吓，只餘丙組，所以今日挑選咗喺九龍仔運動場舉行嘅丙組聯賽九龍區大戰『油尖旺 vs 深水埗』。
陪老母去咗揾穌哥傾計之後都成點鐘，不過場波仲有幾個鐘先打，所以嘆慢板先去圖書館扮吓關心政治睇吓『亞洲週刊』，今期有講馬來西亞嘅砂拉越，原來砂州元首要退位，呢個未被巫統『收下』嘅州，原來係有權全民公投決定是否繼續加入馬來西亞，真係唔講唔知，我對砂州嘅印像只有燕窩、古晉、婆羅洲、達雅族、砂拉越足球，勢估唔到砂州有如此歷史如此『價值』。另外仲有講被中國共產黨及社會遺忘嘅越戰老兵，分析點解中共希望淡化越戰回憶，又帶大家了解吓越戰老兵究竟點解會喺廣西集會，越戰老兵希望得到什麼，越戰對越南華僑嘅影響。上一上去圖書館，又學到嘢喇。之但係，『亞洲週刊』只係一本由人編寫嘅週刊，人始終係人，有時有啲事件睇法好難有持平，寫出黎嘅係咪就等於真實所有？所以睇『亞洲週刊』唔同睇八封雜誌，睇完還需要自己諗吓或利用互聯網去補充吓。
扮完關心亞洲政治之後就坐火車出九龍塘行路去九龍仔運動場，去到現場啱啱開波，由於毒自一人，所以索性拎埋紙筆一邊睇一邊做埋比賽小統計好過，好過打飛機。油尖旺身穿紅衣黑褲，至今喺丙組17場不敗做領頭羊，下半季有鄭廷智離隊，但油尖旺實力依然足夠冠絕丙組，相信下季可以升班。而深水埗身穿黃衣黑褲，暫列第4，與油尖旺一樣以年青球員為主，兩隊上半季喺九龍仔仿真草交手，油尖旺贏5個2，今日呢？睇埋落去就知。
上半場喺3點7先正式開，比原定時間慢一個字，初段時間兩隊中場混戰多，5分鐘深水埗先來全場第一個攻勢，開角球頂中但稍稍高出，俾深水埗壓咗幾分鐘，油尖旺開始醒過來，8分鐘連續取得3次射門，但冇腳中。11分鐘，深水埗角球攻勢差啲開紀錄，呢段時間兩邊都鬥快，到咗16分鐘，油尖旺前鋒梁烙峰喺禁區內揾到機會勁射，但對方守門員飛身勇救，個波溜喺邊線正要出界之際，潘嘉煒及時將個波錨返入禁區但冇人接應。去到20分鐘，覃鉅晴先射入一球窄角度靚波，油尖旺領先1比0。補時階段，深水埗角球攻勢，油尖旺球員解圍時唔小心頂咗個波俾深水埗球員，呢個企喺門前幾碼嘅球員立刻窩利抽射，點知炒波底高出，半場就咁玩完，補時補咗成7分鐘。
上半場初段深水埗喺中場不停向油尖旺壓迫，令油尖旺有段時間措手不及，但油尖旺始終技高少許，20分鐘起拎返主動權，深水埗主要靠死球及反擊，而油尖旺喺丙組接近完美，但防守死球有啲缺點，深水埗好幾次差啲靠死球角球破門，不幸嘅係末能把握機會。
上半場小統計：
油尖旺
射門( 中門)：12次(2)
犯規 ( 越位)：3(1)
角球：1
黃牌：0
紅牌：0
深水埗
射門( 中門)：6(1)
犯規 ( 越位)：4(0)
角球：4
黃牌：0
紅牌：0
下半場5分鐘潘嘉煒接應長傳禁區昇頂破網，油尖旺領先到2比0，8分鐘，深水埗角球又頂中網側，之後都冇咩好說，全場完，油尖旺贏2球，一場幾精彩嘅比賽終於踢完，完場後同油尖旺球員擦身而過，我發現有幾名油尖旺球員幾熟口熟面，唔係什麼前甲組，係好似喺北區見過佢地。今日呢場波當中油尖旺嘅射手潘嘉煒及深水埗嘅射手徐嘉浩表現幾好，而另一個邊後衛覃鉅晴都幾搶眼，能攻能守，呢班球員話唔定末來有機會喺頂級聯賽亮相，信不信由你，沙頭角兄弟喺丙甲嘅時候，都係好突出，當時我已經有諗過，呢兩個鶴佬仔會唔會打打吓打埋上甲組？點知，打埋香港隊添，吹咩，保安變香港代表，問你死味，咁有咩唔得？
下半場小統計：
油尖旺
射門( 中門)：6(2)
犯規 ( 越位)：5(2)
角球：3
黃牌：0
紅牌：0
深水埗
射門( 中門)：6(2)
犯規 ( 越位)：9(0)
角球：3
黃牌：0
紅牌：0
没有评论:
发表评论