今晚英超開波，成個facebook被洗版，所以話英超威力喺香港真係好強大，如果香港聯賽都係咁多人關注就好喇！(發夢)老老實實，我都曾經係英超狂熱追隨者，不過數返已經係13年前嘅事，講緊嘅係99-00個季，亦都係我脫離英超前追睇嘅其中一季。由於居住嘅地方接近深圳加上住爛村屋所以可以免費睇到中國大陸嘅幾個電視台，當時呢堆大陸電視台有好多免費直播嘅體育賽事，深圳台有中國甲A深圳平安所有主客比賽及世冠盃嘅直播，廣東衛視有中國甲B廣州太陽神及廣州松日部分比賽、大學足球賽、中國國際象棋聯賽、省港盃、部分英超比賽直播，珠江台有部分英超比賽及NBA直播，中央一台間中有中國國家足球隊嘅比賽直播，可以免費睇咁多體育比賽，雖然生活係清貧，但已經覺得好幸福。會睇英超都係因為廣東衛視同珠江台有直播嘅關係，仲記得廣東衛視晚晚去到凌晨12點之後香港地區就會收唔到，睇睇吓波『擦』一聲乜柒都冇晒得雪花一片都已經習慣晒，後來分咗啲比賽比珠江台播就更好，因為珠江台凌晨4點先會收唔到。
我係98-99呢季先正式學人睇英超，呢季曼聯、 阿仙奴鬥得好激烈，列斯聯、韋斯咸等曾經喺當年排喺好高嘅位置，錫周三、高雲地利、打比郡、溫布頓等仲喺到，到咗99-00呢季我支持嘅溫布頓、屈福特都降班令我痛不欲生，曼聯個季超班但下游都幾刺激，最令我印象心刻係巴拉福特要去到最後一場先宣佈護級成功，主場以1比0贏咗利物浦之後(好似係利物浦)，好多巴拉福特球迷都衝晒落場，有球員激動到喊，不過最令我激動嘅唔係巴拉福特嘅拚死精神，而係睇到最感人嘅時刻突然『擦』一聲乜柒都冇得睇得雪花同埋令人毛骨悚然嘅『沙沙』聲，真係咩粗口都飛晒出黎，不過有得免費喺電視睇到就算得三份一其實已經好開心，因為當年想睇英超只得四個方法：
1.裝有線 - 但當年有線未做到去呢個地方，即係就算有錢你都搏唔到
2.去現場睇 - 冇可能
3.落吧 - 當時未成年仲係好乖
4.將魚骨天線移去深圳梧桐山方向接收大陸電視台 - 缺點就係香港電視台會收得好差兼廣東衛視凌晨12點之後香港地區就會收唔到。
之後00-01個季大部分比賽都係放喺廣東衛視到播，我就因為怕睇得好地地突然『擦』一聲乜柒都冇得睇引發個種失落感而正式遠離英超，估唔到就此直到現在。其實現時除咗裝收費電視或小米盒子等可以睇到英超直播賽事之外，網上面已經好多Link可以睇到英超嘅直播，而且有啲畫質拍得住電視，要睇英超真係一件非常容易嘅事，不過就係冇呢個心去睇，可能個種興趣已經完全消失咗，有時嚴重脫節得太耐係好難在追得返，老老實實如果唔係facebook被洗版我都唔知今晚英超開波，所以都係主打返自己現有嘅興趣算數，即係香港聯賽同印尼聯賽，香港聯賽係自己地方嘅聯賽，係現場睇嘅比所有電視直播更真實，而印尼聯賽就係另一個消磨時間嘅興趣，其實呢兩個聯賽要睇都大把嘢睇嘅，印尼聯賽ISL及IPL都有直播，甚至次級聯賽都有直播，而香港聯賽除咗甲組之外仲有乙丙丁預備組及青年聯賽，如果在跟多幾個聯賽真係會冇晒啲時間休息，所以我同英超都係緣盡。
Premier League season: 1999-2000(football.co.uk)
http://www.football.co.uk/manchester_united/premier_league_season__1999-...
没有评论:
发表评论