神州嘅百度吧，『哈薩克足球吧』內，有一篇【中國足球實施新版洋務運動面向中亞征戰哈超】，一出立刻被河了，點解被河了相信大家都知道原因，不過我今次係想講，點解會有咁嘅諗法。
Topic末被河前，內文提到新疆足球及中亞足球嘅關係，其實，有咩關係？呢啲唔多說，重點係新疆足球發展唔到，潛力足球員想踢職業聯賽，就要東去。但唔係所有新疆維吾爾族足球員都識普通話，生活文化漢族同維吾爾族完全唔同，仲要忍受排斥，所以只有少量維吾爾球員可以抓緊呢啲機會，其他球員？只有解散，實在浪費。
由於維吾爾球員出路唔多，所以有新疆球迷就諗出新疆足球嘗試向哈薩克足協敲門，如許可，派隊加盟哈薩克聯賽，因為哈薩克與新疆接鄰，而哈薩克超級聯賽規模唔細，吸引咗唔少前蘇聯成員國國腳例如烏茲別克國腳加盟其中，而且哈薩克雖然係同新疆接鄰但屬於歐洲足協成員，新疆球員有機會比其他哈薩克球會睇中，可能一個唔小心就代表哈薩克球會去踢歐聯、歐冠，仲唔High到屎眼標汁？最重要，中亞文化更合維吾爾族球員。
當然，只係球迷幻想，如果神州共產黨真係批准，大家會有咩聯想？新疆派隊加盟哈薩克聯賽，黑龍江要加盟俄乙，原因就係海參威都打俄甲，海參威就喺我隔離，點解新疆得，我唔得？延邊長白虎又話要加盟韓職，原因就係大家說韓語，麗江嘉雲昊又話要加盟緬甸聯，因為佢地去緬甸快過去廣西，西雙版納FC又話要加盟泰乙，因為佢地去泰北快過去昆明。。。。
不過，據網上有資深球迷透露嘅末經證實消息指，由於有大量維吾爾族球員喺中國冇出路，所以有部分已經去到中亞踢，例如哈薩克、烏茲別克、吉爾吉斯，仲放棄埋國籍，甚至老作出身地方。其中一個流傳消息，就係話烏茲別克嘅國腳阿美杜夫本來喺新疆出生，踢過四川全興U13，全興解散，佢比烏茲別克睇中，放棄中國國籍做烏茲別克人，仲老作出身地方。
不過冇來源證明，你吹乜都得，我夠可以話陳七其實係蒙古人，Garidmagnai Bayasgalan係佢孖生兄弟，蘇偉泉其實係東帝汶人。不過，神州有咩唔可以發生？大家記得倫敦奧運女子舉重63公斤級金牌哈薩克選手Maiya呢件事？Maiya以前叫姚麗，我相信姚麗嘅個案只係冰山一角。
没有评论:
发表评论