今日本土足球聯賽有成19場比賽任君選擇，想睇有質素保障嘅？比60蚊揀高級銀牌囉。想平平地一日，又唔介意水平，揀足總盃初賽、揀丙組聯賽、揀丁組聯賽又得啫，睇埋早場？揀埋青年聯賽囉笨柒。我呢啲笨柒就選擇咗沙田上演嘅丁組雙料尾場，洪興 vs 東昇。呀唔撚係，係瑞聯 vs 東昇。
東昇暫列丁組第4，上場喺青衣東北以6比0大勝丁組第3嘅離島，陣中球員普遍年青，部分有甲組經驗，有踢過飛馬、愉園嘅陳啟康，2005亞洲足協少年(13歲以下)足球錦標賽香港少年代表隊職員/教練陳建華，上季效力橫濱FC香港嘅關華恩，上季效力大埔嘅范家朗，前東方球員甄梓勤等，實力上絕對係丁組前列。
瑞聯暫列丁組包尾，上場喺青衣東北以0比6不敵龍門，至今全敗，陣中球員大多名不經傳，如勞啟昌、關啟聰、許振耀等，實力上絕對係丁組最弱，呢場波，末打已預測實力懸殊，不過，馬爾代夫都可以打和南韓，有咩撚嘢係冇可能？
未到運動場前，當然要去對面禾輋邨街市揾啲嘢食，人唔食嘢唔撚可以架嘛，你咁辛苦返工為乜？其中一個原因，就係為咗食(吊住自己條命)，辛苦搵嚟志在食。我選擇咗喺禾輋街市用18蚊買一盒雙拼燒味飯，在去士多買多兩罐啤酒，加埋唔撚洗30蚊，找咗嘅錢仲可以買多罐大啤酒，喺呢個乜柒都貴嘅年代，30蚊唔撚洗就有盒雙拼燒味飯，又有碗例湯，加多兩罐冰凍啤酒，好唔好食已經唔係一個重點，好食定唔好食，俾得呢個價錢你都冇嘢好講啦，仲想點呀？
去到運動場啱啱開波，一路食一路睇一路聽收音機，真係成個旺角場阿伯咁款。呢個沙田運動場出命係地爛，幾年前福建仲喺乙組，我走去沙田睇葵青對福建，簡直嚇撚死我，以為去咗時租停車場，簡直係地獄主場，地獄到可能冇人踢得掂，個場冇草咁滯，所以今日已經算好，今日起碼有啲草，雖然一大力少少已經沙塵滾滾，不過係咁架啦，場地問題，就算甲組都唔多人理啦，何況下面個啲，三個英文字啦，W F C。
講返場波，兩隊實力有啲差距，瑞聯以守為主，希望輸少擋贏，不過守到6分鐘就頂唔順，東昇一個二傳輕易破門領先1球。12分鐘，東昇球員策劃攻勢，喺中圈大腳斬向右路，點知16號球員櫻木花道式搶籃板嚴重手球，黃牌。然後，都係東昇攻勢，小組撞牆橫傳掃射、邊線傳中衝頂、遠射、半單刀，東昇做齊晒，只不過，一係射唔入，一係比瑞聯球員瓦解，半場瑞聯 0-1 東昇。
東昇射門次數已經有20幾次，瑞聯0次，呢半場瑞聯只輸1球已經要謝天地，瑞聯只靠反擊，前鋒有少少速度，除咗速度，其他嘢真係唔多見有，每次一拎到個波就衝呀，之後？斷咗囉，不過唔可以怪瑞聯，因質素所限，呢個可能係佢地唯一可以利用嘅方法。
下半場13分鐘，東昇掟界外球入禁區，瑞聯守門員打手鎚打中鬼打唔中個波，東昇球員面對空門輕易篤入，東昇贏到2粒，去到20分鐘，瑞聯球員體能下降得好快，因此防線嚴重崩潰，導致26、31、33分鐘，8分鐘內連失3球，東昇贏到5粒。39分鐘，東昇守門員終於喺下半場第一次掂波，43分鐘黎多個單刀，最後東昇贏6個埋單，瑞聯全場0射門。
巧合地，上星期東昇大勝離島6-0，瑞聯 0-6不敵龍門，今日東昇又贏瑞聯6比0，真係巧合地啊。
我睇波，一向以「角度形式」分類黎睇，港甲，用港甲角度去睇，印尼超，用印尼超角度去睇，港乙，用港乙角度去睇，丙丁組，用丙丁組角度去睇，因為，水準、節奏、風格不一。丙丁組角度之下去睇呢場比賽，算係精彩，節奏唔慢，有精彩小組配合、有流暢之撞牆，有精彩撲救，有精彩笠射，有精彩之搶籃板，正呀屌你！你睇吓圖中個位哥仔就知場波幾精彩啦，精彩到訓埋喺到。
没有评论:
发表评论