任何人成為球迷之前，都係一個勝利球迷。
點解你會鍾意一支球隊？可能因為佢地不敗奪冠，可能因為佢地入波夠靚，又或傳送獨到，又或者防守嚴密，甚至只係因為碧咸靚仔。人總係會因為某d「勝利元素」先鍾意一隊波。冇人會因為隊波輸得夠核突，或者夠晒茅，又或者年年降班所以鍾意，話會果d 你千祈唔好同佢踢波。
而所謂「真球迷」，就係當你鍾意左一隊波之後，會去了解佢地，會去研究佢地，然後好似變左一家人，慢慢就由一時衝動，變成細水長流，之後就算隊波再冇奪冠，甚至踢到護級，你都以身為 XX 隊球迷而自豪。其實幾傻仔，但如果我同你講我係諾定咸森林既球迷，你應該要用一份既尊敬又憐憫既眼光望住我，然後對我講聲「加油」，等於十年前同人講你係曼城球迷，因為你鍾意孫繼海，情況差唔多。
講左咁耐，其實都係想講，我幾鍾意謝拉特。我知你實話我係 Glory Hunter 見利物浦今年好有機會首奪英超，所以拿拿林出黎認屎認屁。而事實上我都唔算真球迷，例如當年「伊斯坦布爾之夜」，我果晚較左鬧鐘諗住起身睇，點知鬧鐘響完到我真係開著電腦連到線睇果陣，岩岩上半場完，落後 3 比 0 ，所以我就訓返，第二朝先知利物浦居然反勝，可惜果陣唔識得上高登開 po 問「訓左冇睇」。
「若要生活好，咪買利物浦」，是足球界常識。唔係話利物浦差，假假地都歐聯冠軍，亦唔係話佢地實輸，只係咁多年黎最多人批評既，都係太過海鮮波，踢出黎冇 form，齋打士氣波，當旺果陣好熱血，低潮果陣就連學界都贏唔到。所以起伏好大，而通常都係你買果陣就伏，你熄機訓返佢就贏。所以今年係咪真奪冠？
話說回來，今年好多人都希望利物浦真係奪冠，好大原因係謝拉特未必有下一次，今年球季完佢就 34 歲，就算唔退休都踢唔到幾多場。歷史上好波、忠心而又帶著遺憾退休既球員有好多好多，暫時冇人知謝拉特係咪會成為下一個，抑或臨退終於一嚐聯賽冠軍滋味，呢期利物浦既球迷真係訓唔著。
諗深一層，其實大多數波都好悶，係入波果下興奮。你話睇戰術，但大多數球隊本身都踢唔出咩戰術，或者有，但唔覺。或者你真係識睇，但其實絕大多數人都唔識睇。99% 真正鍾意既，唔係睇波，而係吹水，賽前論戰同賽後抽水，永遠都精彩過賽事過程，有時比起入球精華仲有意思。冇朋友、冇家人、自己半夜一個爬起身上網聽俄文睇波？你唔開著高登同 Facebook，半場左右多數人會後悔點解唔訓多陣。
諗落真係好辛苦，而且黎緊就世界盃，又要答你果D 四年睇一次波既朋友咩叫「越位」、點解曼聯冇參賽、仲有高比拜仁咁好波點解打後衛。
離晒題。
其實唔知呢一篇放唔放得 HKO，仲要口語化，如果多過 100 個 like 我就繼續。
原文刊於此
没有评论:
发表评论