題為編輯所擬。
立法會議員陳恆鑌企街派花，四處同人講「母親節快樂」。有班女街坊幫手做義工，大家一齊派得好開心咁。
民建聯點解咁疊水，一般街坊好少深究。人地籌款賣幅畫就收到過千萬現金喎，唔好計平日林林總總既捐獻。點解香港咁多大白象工程，次次撥款都暢通無阻，出左事追究起來又次次大步檻過？唔好話好似石禮謙呢D建制派議員咁直接有利益衝突，作為咁有米既第一大黨，點會無大水喉？除左阿爺，點少得D大地主和大建築商呢？大建築商有大工程，要融資，搵銀行及金融機構幫手，有大茶飯齊齊吔，當然亦會照住第一大黨咯。
咁D大茶飯點可以不斷有得食？如果真係好似D經濟學者咁講，但凡資金持有者對經濟都有好大貢獻，識得化腐朽為神奇，咁銀行水浸咁耐，香港就唔會百業俱疲，獨獨炒業興旺啦！（註）揸鑊剷最搵到食，都要有野炒至得，上市公司都要有業務架嘛，咁在産業空洞化左多年既香港，有乜生意畀地産和大興土木更好賺呢？所以香港豆腐潤咁大D鐵路呀公路呀不斷咁起，交通係方便左，但亦要係咁收地、收D舊樓和小店，拆晒佢起D豪宅和豪華商場出黎賣錢咯，原來土地既使用者就被強拆、迫遷。撈唔番本行？是妳/你無與時並進，無提升競爭力，係自己攞黎衰，與人無尤架！
但D樓價和租金已經咁高，一般市民點負擔得起姐？咁咪唯有靠國內D資金和旅客湧來香港撐住個市咯（點解無乜中國以外既資金和旅客？不用畫公仔畫出腸吧）於是在D旺區滿街係國內旅客，藥房金鋪越開越多，原本為本港居民服務既小生意死得七七八八，剩番D連鎖店集團，價格高昂，貨品款色單調。
然後我地要問：假如我地有工返，我地間公司究竟提供緊乜野服務？我相信，它直接或間接係替緊上面描述的經濟運作模式服務，我地固然受緊佢剝削和壓榨，但我地同時從它身上得到好處，當然佔大份額既永遠唔係一般市民啦。
然後，試下幻想有一個婦人，和個仔租住在舊區一個小單位，被市建局收樓，得番雞碎咁多賠償。好唔開心，都仲要日日返工做12個鐘賺一萬幾千蚊。落到街過馬路，佢隻腳被自由行旅客個喼撞到，痛到飛起，對方轉頭走左，她破口大罵：「死蝗蟲，趕住投胎呀！」轉個彎，她遇見陳恆鑌，遞上一支花：「母親節快樂！」她感受到人間的一絲溫暖，決定下次選舉，投票給民建聯。
註：所以撤資作為一種恐嚇，究竟個原理係點，真係要搞清楚咯。對社會當然有心理影響，但若果是熱錢的話，撤走左對一般市民究竟利多定弊多先？唔係話越多錢來香港越好架嘛。好似農産品咁姐，大失收固然唔係好事，大豐收拖冧市價，賤物鬥窮人，農民一樣唔好過。
圖：陳恆鑌面書
没有评论:
发表评论