文：怒逗張 https://www.facebook.com/theconcordia
是咁的，我個名叫做路姆西，係一隻公仔，相信呢期大家對我都唔會陌生。人怕出名豬怕肥，公仔更怕被嫌棄，大家做公仔都係想俾人追捧，想帶俾人歡樂，但係當全世界買我返嚟都係為咗要吊我嘅時候，我真係忍唔住要講返聲「喊出嚟」。
果晚，我望住我手邊個阿婆，我食唔落飯，我食唔落呢個要一齊陪我比人吊既阿婆… 究竟係邊個幫我地改個咁既名？
我望住民望直插既CY，我望唔透，我望唔透你哋啲人點解要吊我？我同你哋無冤無仇，就係因為我個樣比較CY比較樣衰你哋就要吊我黎影射佢？就係因為我個名夠好吊你哋就要虐待我？我明明冇做錯，明明錯果個係果隻CY，明明我靚仔有型過佢咁多，明明應該比人怒吊果個係佢，點解你哋要攞我嚟出氣？
你哋唔係以為真係靠吊下路姆西就可以解決到個問題下話？你哋仲想搞到幾多隻路姆西？
唉最慘既係，作為一隻路姆西周街比人吊已經驚變鬆架啦，啲棉花，家陣仲要比CY放埋上佢張檯度影我路姆西，真係咩架都比人丟曬。明明就係因為佢我先會比人係咁吊，家陣就想借我過橋扮曬親民咁款，厚顏無恥果然天下無敵。定係佢根本係度攞我嚟耀武揚威話俾人知你哋啲香港人同我路姆西一樣，都係任佢吊掉丟。
仲有你哋，係呀你哋班HiHi呀，你哋根本冇理過社民連掟我果單嘢！經過此役之後，我已經由一隻普通嘅路姆西升左上神枱，成為咗一隻帶有革命色彩嘅路姆西！你哋呢啲唔關心政治嘅人，淨係識得盲目跟風，你哋根本唔明咩叫吊路姆西，你哋唔配擁有一隻路姆西。我係一隻擁有立場嘅路姆西，唔係俾你哋攞嚟晒自己有幾羊群心理，甚至炒賣我！周街都有路姆西，連你阿媽都有路姆西啦，你再炒賣我嘅話我只可以懷疑你腦有問題。
太過分啦！若然係為咗政治獻身的話，我都願意日夜俾人亂咁吊亂咁掉，但係你哋點可以玩完人哋之後繼續若無其事咁對住呢個社會架！你吊完我，用我路姆西打完個丁之後，可唔可以為社會做番啲嘢？你掉完我，威完之後，可唔可以多啲關心下個社會？
我唔想做隻人云亦云嘅路姆西，就算係路姆西，我都要做隻有意義嘅路姆西！如果冇意義，同隻咸魚湊西有咩分別？
没有评论:
发表评论