港鐵「又」加價，佢真係同稅局一樣，最鐘意係乞兒兜度拿飯食。當我仲供緊我分左24期，而24個月內已經爛左嘅爛電腦，財政緊拙過埃賽俄比亞政府嘅呢個月尾，港鐵再次挑釁我。再加價，我月尾都真係要預備定件one piece 游水衣，游過對面海返工架啦。
早排網上有個類似懷念過去的Facebook 相集，show 左張小童20 蚊儲值車飛，咁岩有個10 歲嘅死靚仔上我屋企玩……
死靚仔：張飛點操作架？
我：好似八達窿咁囉，100蚊扣到冇為止囉
死靚仔：扣到得1 蚊個時，冇得增值係唔係唔用得？
我：唔會架，你得返1仙，都會比你過架，你可以搭去邊都得架…
死靚仔：咁佢咪好蝕？
「死靚仔」咁講，真係「一言驚醒夢中人」，我黯然過家燕媽媽，因為那個年頭，我搭緊嘅係「仲肯蝕左比我」的「地鐵」。
「舊屎」地鐵未有真屎個時呢……
- 仲會因為用張剩返1豪子飛過海而覺得咩都抵返哂。
- 20 蚊小童飛係夠一個星期返學放學。
- 冇幕門個時，架列車飄出來個野，只要我迎面同架列車say hi，我D 頭髮就可以panteen 般柔順地吹起。
唔知由幾時開始……
- 張八達窿山窮水盡個時，會發出剌耳的DOOOOO 聲，提醒我呢個窮人「又冇錢啦你」。
- 著住套校服排隊交20蚊證明你係學生，施捨你用學生價。
- 起多個幕門，都要我地籌旗籌幾年。整個「慈善星輝耀港鐵」，叫班有錢佬出啦，點解叫我地夾呀？夾完錢又要比個幕門夾。
- 個個站都有好多好多鋪頭，以前MK 站點E 出口點會咁窄，而家個MK站，就好似塞哂勁多脂肪的心臟血管一樣，真係次次係個度殺出重圍，上到地面個刻，都覺得自己好似幫MK E 出口完成左次通波仔手術一樣。
我真係問題天天都多...…
港鐵個個「可加冇減我地冇得揀」機制條formulae點樣計？D 「故障」點解唔推出10送1 套餐？好似7仔儲印花咁，10 次故障「送我一程」，成日故障，都「送下我上路」，我條氣先順返D呀。
我強烈要求朝早開放維港比我游水過對面海返工，有益身心之餘，又可以唔洗蝕比港鐵。可能仲有機會發掘到D 適合參選奧運游水項目嘅打工仔，香港打工仔趕時間返工個時，真係快到冇影架。我怕月尾維港迫滿無錢搭港鐵返工D 打工仔渣，so sad。
原文載於姐死姐還在 Facebook 專頁
没有评论:
发表评论