尋日港足有場足總盃大戰南華對傑志，呢兩支港甲勁旅對碰，例必引起關注，但大家可能唔知，尋日丁組亦有場『大戰』，就係下游『大戰』北區對瑞聯，呢兩支球隊分別排喺尾二及包尾，瑞聯已肯定來季出局，北區亦唔需要為護級努力，其實呢場所謂『大戰』二字只係我鳩嗡加落去，但丁組兩弱對碰仍可以是個『賣點』，反正星期日例必休息，呢啲有今生冇來世嘅比賽，去睇吓都唔過分。
值得一提，呢場比賽喺北區運動場上演，嚴格上係北區主場，但丁組沒有所謂主客制，唔計呢場北區只係喺北區運動場打咗2場比賽，都係輸波，今次返到『主場』對瑞聯只係例行公事，但有機會『主場』贏返場波，如果係咁都係一件好事，儘管冇咩人理。而瑞聯未計呢場前已18場不勝，面對實力較為接近嘅北區又可唔可以拎到分破蛋？呢個亦係比賽嘅『賣點』或入場理由。
我到咗上水嘅時候已就快開波，但人肚餓就要食嘢，所以我求祈喺附近買碗營多撈麵特餐頂住算，所謂特餐即係加多兩粒燒賣，唔緊要，但冇人排隊之下煮個營多煮咗兩個字仲未得真係太過分喇，我喺垃圾桶打完邊爐返去仲話煮緊，望吓時間三點半喇不如包營多唔好煮比我成包就咁拎走擋媽咪麵食算，不過一問之下原來呢啲小鋪租金都好貴，老闆請唔起人，假日會揾個仔客串，由於唔係熟手，所以有時係咁上吓，又唔可以完全責怪佢地，所以睇丁組波遲到冇咩所謂，呢啲平民小鋪可以生存先係重點！
不過最後都係遲到，只好行快啲，但我見有幾個人直情鬥跑100米咁跑去運動場方向，丁組啫洗唔洗咁緊張？原來呢幾個係瑞聯球員，跑住入場就係因為遲到，如果甲組比賽球員遲到就會好大獲，但丁組就。。。只要唔係太過分，大會係『包容』嘅。
由於例行公事，冇嘢好爭，所以兩隊都踢得非常『友誼』，北區技高些少，大部分時間取得賽事主動權，瑞聯就以防反為主，雙方各有攻勢，半場北區以兩個十二碼及兩個其他形式嘅入球領先4比0，下半場北區在入一球遠射，最終大勝5比0，贏波後以17分升上第9位。
球季即將完結，今年睇咗唔少乙丙丁賽事，有唔少球員其實都好擺心機落去，乙丙丁組亦非WFC冇人理，但球迷想進一步了解乙丙丁組，渠道不多，大部分資料係來自Facbook及足總網站，關於乙丙丁組資料，足總網站資料算充足，但乙丙丁組賽後報告卻冇球員號碼，令球迷非常難『認人』。
没有评论:
发表评论