圖：蘋果日報
近日嘅曼聯超級盃，令我有一樣野好想分享一下感受，話說唔知咩原因，而只可接受12隊報名（我覺得足球總會成日畀人鬧，其中一個原因就係唔夠透明，好多野都無說明原因，例如呢個超級盃點解只可以容12隊參賽？係因為場地？賽制？定主辦單位要求？如果肯講清楚D，就唔會令大家有咁多誤會，亂咁估，甚至鬧…）
而報名嘅優先次序就係1.上年四強2.甲組會3.乙組會⋯如此類推，但咁嘅賽制，就會令一D今季表現好好嘅非甲組U15球隊例如港會、九龍木球會、荃灣等等失去左參賽資格，而果然，報名期結束之後，12隊甲組隊悉數參賽，最有趣嘅係原本响U15青年聯賽無出隊嘅幾間球會，例如東方沙龍、元朗、灣仔南華等等，就特別因為呢個可以有機會代表香港出外嘅比賽，而出隊參賽。
問題就出現了。
本來無U15嘅球會，用咩人去參加呢個曼聯超級盃呢？
有趣之處係曼聯超級盃有一條特別條例，球會B嘅球員，可以借用畀球會A去踢呢個曼聯盃，而唔影響足總青年聯賽身份。我亦唔知呢個係主辦單位嘅條例，其他國家地區亦一樣，還是香港的特有文化 - 因為唔可以有太多隊參加而「執生、變通」。有呢條條例，當然令一D好波，但參加唔到曼聯盃嘅好波球員，可以借去第二隊爭取到參賽機會。但細心分析，如此賽制，壞處有：
1. 本來架構完善、表現良好嘅球隊無得參賽，球員四散去其他隊，球員既無歸屬感，亦不熟悉新球隊踢法，未必能有最佳發揮。
2. 有其他球隊球員加入，令原本參加曼聯盃嘅球隊球員出場機會被分薄，練了大半季，甚至可能一直係正選球員，一下子失去了出場機會。球會要爭取出線爭取出外參賽機會爭取成績無可口非，但平衡成績與球員感受，係好重要嘅一門學問，尤其是青年球隊。
甚至亦有球隊提升細仔去取代原有的大仔出場，呢樣就難講D，始終同一球會，實力行先，應不受年齡限制，但球會必須公平公正，服到人，及安慰及勉勵後備球員。
3. 一D本身無U15嘅球會，甚至為左爭出線，有機會將個球會「殻」，成個借畀另一隊，令球員對「球會」毫無歸屬感，令球員養成了不好的習慣。其實香港已經好奇怪，好多小球員，從小就踢幾隊球隊，比賽A，就踢xxx球隊，比賽B時，因為xxx無報，我就去踢yyy，踢完比賽B，就返xxx練波，甚至响下個比賽代表xxx 對 yyy添。想當年巴塞足校技術總監都已經大感驚訝，但卻是我們香港足球文化一手造成的。
4. 另一種做法，就係明知自己球隊唔夠實力贏，但都堅持唔外借球員，寧願用自己梯隊嘅細仔越級挑戰，明知輸都要挑戰，呢個做法固然值得欣賞，起碼令球員知道球會重視自己，分外拼搏，增強歸刷感，亦令細仔們加速進步。但始終呢個係有機會代表香港出外參賽嘅比賽，有D有實力嘅球隊就無分參加，而變成小球會鍛鍊嘅平台，會否有點兒奇怪？！
這一切問題都係源於一個奇怪嘅賽制，一個好嘅制度，先至可以令一個地方嘅足球發展得好。
上次Nike 5、今次曼聯盃都花左一個上午去寫，我明明好多野做，但都不吐不快，都係果句，任我點發up風，好大機會一D影響力都無，但我始終相信，唔講，唔代表無問題，我講出黎，有一個人睇到都好，都有希望影響到件事，令主辦者反思，做得更好。
希望唔好覺得我淨係鬧，雖然文筆唔好，但我提出嘅論點都算可以吧，當然，歡迎大家討論交流。
没有评论:
发表评论