（純粹懷緬過去文章）
今時今日，一個完美嘅細路當然係要有愛因斯坦嘅智慧，奧運選手嘅體能，習近平嘅schedule，同渴望拎到諾貝爾和平獎嘅決心啦。最近朋友嘅朋友個仔面試幼稚園學前班，第一條問題係：「你有咩志願呀？」。都話唔可以輸係起跑線上，做人係要有遠見，但個細路得兩歲，都要問「我的志願」？
「我的志願」呢個作文題目小學唔知幾年級出現過，由於當時我比較無知，將來做咩？我同我D 同學都係參考返本英文教科書。又由於當時教嘅職業生字唔多，班入面大約有4分1 嘅同學係做firemen 同埋policemen嘅，另外有大約4分1 比人話冇大志嘅同學係想做driver，仲有4分1應該有妄想症嘅同學係想做doctor 嘅。其餘我都唔記得啦，當Others啦，但我好記得我後面位同學嘅「我的志願」，佢睇左當時嘅「今日睇真D」，佢寫左葉繼歡。先生當然係怒髮衝冠，「繼歡」同學最後當然係要re-do啦。
（我解釋下邊個係葉繼歡，以防有D 年紀輕嘅小朋友唔知道，葉繼歡因為打劫金鋪sss，「今日睇真D」成日報導。）
「我的志願」係咩？當然係一時一樣，隨住電視播咩而改變啦。
- 第一個志願當然係衛護世界和平啦，睇咁多《美少女戰士》，我大左仲唔輪到我保衛地球。
- 睇《情濃大地》個時，我係幾想做農民嘅，最緊要係唔使讀書，唔止我咁諗，我個班有幾個同學都將條冬季長褲捲到變熱褲，係落雨個時踩落個水氹到，一嘗落田嘅滋味。
- 我承認我當時係有D 無知，睇《肥貓正傳》個時，我見到肥貓係庇護工場入筷子入得幾爽，於是我都有幻想呢個簡單嘅工作幾適合我，後來我睇得肥貓多，學習佢縮膊頭比呀媽掌摑之後，我就打消左呢個念頭。
- 睇《美味天王》個時除左不停唱mamamama mia之外，都激發左我做食家的夢想，當時，我每晚都會彈一彈呀媽煮D 野唔好食。
- 睇《還珠格格》個時，當然係想做容嬤嬤啦，我呢D 成日比人鬧嘅細路，當然想好似容嬤嬤咁係唔係都鬧人啦。我因為模仿跪見皇上，跪瘀左個膝頭；仲因為不停拎屋企紙巾盒D 紙巾，扮容嬤嬤攝係加拿大個條絲巾而再次比呀媽掌摑。
- 有時真係幻想下好啦，實踐真係好有難度。播《烈火雄心》個時終於都因為係家中實習fireman 嘅工作而出事啦。我係有大志嘅人，我當然係想做勇救3級火嘅Fireman 啦。屋企冇雲梯唔緊要，碌架床條梯岩哂。正當我好努力的訓練爬「雲梯」時，PK 了，我都估唔到我個頭生長嘅速度係咁迅速，我個頭攝左入條梯個窿到。本來我覺得唔可以樣衰，要保持鎮定，逃出生天。我掙扎左大約3 至30 分鐘，我終於頂唔住大叫媽咪。呀媽勇猛過王喜，扯返我個頭出黎，再鬧左我3至30 個星期，仲係接我放學個時，同3至30 個同學仔媽咪sss開心share，如是者，「我以後都唔敢啦」。
扮完fireman 之後，我改過自新，大大下，我都唔記得「我的志願」。細個個時仲會想像我可以做咩，但當我開始學能測驗特訓個時，我就明白，「你想做咩？」呢條題目，係應該引用答multiple choices 的刪除法。大大下就會發現，人生唔係好盞，唔係樣樣比你揀。好似考AL揀科，畢業個時JobsDB一樣，多數都係你eliminate 哂你做唔嘅野，有咩剩咪揀咩囉。
回想起「葉繼歡」同學，其實個先生點解唔睇埋佢點解想做「葉繼歡」先叫佢re-do 呢？可能個先生大大下，都引用左multiple choices 的刪除法來生活，「我的志願」嘅marking scheme 相信都係英文教科書個幾樣職業。我打從心裡覺得「繼歡」同學好有創意，奈何香港社會係唔會包容與別不同嘅細路。縱然生活逼人來，好多野就好似選特首咁，冇得你揀，但我仍然相信而家冇得揀，唔代表要排除有得揀嘅可能。所以，唔好一野打沉D 「創作力量同幻想會嚇你一跳」嘅細路。
PS. 幾年前，係Facebook搵返我4年級的30幾個小學同學（我學校4至6年級都冇轉過同學的），真係有人做左teacher，有人做左policeman，而個4分1 有妄想症想做doctor的同學仔一個都冇做過doctor。至於「繼歡」同學，好彩佢都冇入到赤柱監獄，最後佢做左酒店廚師。實現唔到志願看來不是壞事，因為如果你嘅志願係葉繼歡，唔實現係比較好的。
原文載於姐死姐還在 Facebook 網頁
没有评论:
发表评论