2014年7月14日星期一

香港獨立媒體: 其實放榜,又有咩好驚喎?

 
Crabtree & Evelyn.

Pamper yourself and save money with value size items on sale.
From our sponsors
其實放榜,又有咩好驚喎?
Jul 13th 2014, 15:32, by Jerry sir

各位同學仔,聽日放榜啦,你實會驚入唔到U,驚ive都唔收,驚要讀副學士……傻嘅,放榜之嘛,有咩大不了。

照吓鏡望吓自己,做咗十幾年人,你真係知自己想點咩?你問吓你個心,入大學,真係你嘅「夢想」?我唔會話讀大學唔重要,我只係想問你一句,你可唔可以畀一晚時間,問吓你自己想點。

喺香港地讀書,好似得一個目的,就係入大學。當社會上大部份人都諗緊同一樣嘢,呢樣嘢一定好恐怖。因為佢間接話畀你聽:「喂,細路,你唔好行差踏錯啊!」所以同性戀係錯,唔貪錢係錯,唔聰明係錯,連入唔到大學,都係錯。

你行出門口,就見到一街名師話你聽佢地幾勁幾勁,幾多個5**、幾多學生入三大;你番到學校,老師唔教你知識,反而教你操卷,你話你覺得悶,老師竟然話入到大學咪唔悶囉。於是你努力讀書,你唔追求知識,你追求成績。明明你爸爸媽媽好慳,但係一個月畀幾千蚊你去補習。明明你好唔鐘意讀書,但係你日日走去自修室死磨爛磨。

點解要咁病態,幾萬個學生要做同一件事啊?因為「入大學好重要」,重要到你根本唔知點解咁重要。我知,你會話而家大學生都搵唔到工,咁升唔到大學咪死得?喂我明喎,我點會唔明啫,我當年唔係咁諗,點會搏晒命考入大學啊?

但係我想問,而家點先,大家都搏晒命,係咪入唔到U就係垃圾?係咪入唔到U就等於晒咗十幾年?不如算啦,誠實一次吖,今晚你問問自己,你,係咪真係咁想做一個大學生?

呢個社會已經本末倒置咗好多年,聽日就係審判日,一晚吖,畀一晚自己,真正誠實一次。如果你諗清諗楚,你話你真係想讀大學嘅,咁你已經搏到盡啦,聽日係點,你都心甘命抵;如果你話,你根本唔想讀大學,你想做結他手,咁就算聽日科科抄晒咁又點啫。

係啊,我明啊,做人總要妥協,無得咁理想化。所以就算你唔知自己想讀咩,聽日放榜,你個分入到Engine,你都會去讀。因為你無得揀吖嘛。或者你全科都係4,你都會去讀副學士/Retake,你都唔會去玩結他。

你好似好自由,但其實你幾可有得揀?喺今晚,咩前途咩將來,咩都唔緊要啦。因為你未知道成績,仲未有人可以話你知「你應該點做」。今晚,一切都係未知數,你眼前得兩個選擇:「緊張」同「放鬆」。

其實成績嘅嘢,有幾可會畀驚喜你啫?你考完預自己攞3,唔通放榜會變5**咩。你可以考咩成績,你心中有數啦,期望運氣會帶嚟驚喜,講到尾咪又係幻想。

聽日就會有無數人爭住做你人生導師,教你之後條路點行,教你點樣變成有用嘅人。無所謂啦,聽日嘅事,聽日先算囉。反正九成九你都係跟住大家條舊路行,喺今晚,畀一夜自己,好瀟灑咁講一句:「挑,入唔到大學又唔會死嘅。」

十幾年嚟都無得揀,不過今晚,你可以選擇relax一次。嗱,今晚我要睇世界盃,DSE,你收皮啦!

【希望大家開心sha畀其他考生:)】
【千萬不要在instagram輸入 "jerry_sir" ……】

You are receiving this email because you subscribed to this feed at blogtrottr.com.

If you no longer wish to receive these emails, you can unsubscribe from this feed, or manage all your subscriptions

没有评论:

发表评论