原文刊於此
文：張莉莉
乜你以為學生哥真係咁撐廣東話？少年，你太年輕了。作為一個中學生，我見識得最多既就係反廣東話，唔識講中文既中學生。
記得上年我仲係f.4雞，被老師捉左去參加個唔知乜鬼活動，講到好勁架，一時要研究國家大事，一時又要整咩財政預算案，仲話要去酒店到傾通宵添！不過，呢d都唔重要既，最重要既係我終於見識到運用chinglish既顛峰，仲令我識到唔少唔識講廣東話既中學生。
活動第一日當然係o day啦，一入到某學校門口，大家都好開心咁認識對方。但有不少人都係講英文，唔知既話，我仲以為佢地係abc，又或者係整左容既美國人，又可能係英國人。我好少聽到有人講廣東話，當所有人都用緊abc tone講野既時候（其實我覺得當中有唔少係扮出來），我，講左一句：「我叫阿晴。」氣氛好似僵住左咁，空氣唔再流動，我差d以為自己穿越時空，開始聽到有人講廣東話。
廣、東、話、啊！！！我想大叫出來。
到左真係玩city tracing既時候，組員講緊廣東話，不過我經常性聽唔明佢地講咩，點解好地地一個中文字會有r音，仲用緊英文既句型。由始至終，我都係一個外星人，去左一個唔屬於我既地方，到左而家，我仲係望唔透。玩完遊戲後，就返去某學校集合，可惜我地遲到。呢個時候，組爸組媽義正詞嚴咁用英文鬧我地，就好似真正既父母鬧緊你，不過佢地都只係大我們一年。我開始質疑到底係活動既問題，定係人既問題，後來我睇番先知係因為班中學生唔識講廣東話所致。
唔講廣東話無問題，咪當學英文囉。但其實，好戲在後頭。
活動完左，就自自然然地開左whatsapp group。當我仲未搞得清佢地邊個打邊個，中文全名係乜既時候，佢地已經交淺言深，好似岩岩一起共患難，定唔知好似係就快grad，話唔捨得。講呢d係絕對無問題既，問題出於你用拼音呀！！！段段野都咁鬼長，千字文咩，全部都係ngo hao miss nei dei ga咁款既字，唔只whatsapp，就連fb都有。最驚嚇既事竟然有人睇哂，仲覆返佢呀，睇篇咁既野，仲難過睇文言文。
呢一剎那，我對中文考試好有信心。文言文真係好簡單。
講開又講，有一次，個活動好無厘頭地整左個朗讀既部分，比篇文章你照住讀。照住讀，你話有幾簡單呢？如果DSE係考朗讀，而唔係考要用特別說話技巧先會高分既小組討論，我相信呢班中學生會尊重廣東話，尊重自己既文化。第一個朗讀既中學生，嗯，我唔識講，我覺得自己係井底之蛙，唔識世界。佢竟然唔識讀「學校」呢兩個字。
佢將學校兩個字讀成第一聲，變做hock how。
到左討論環節，除左個我、你、既、啦、呢等字外，其他字都係英文。例如，我guess呢，the government should really use some solid measures to solve the problem 囉，if not 呢，我think people will suffer呀。
不過，個活動入面總有d有小小意識既人。有個同學同我講，話覺得自己中文差。
我問：「點差法？」
佢話：「我會將I make you a cake」寫成「我做你蛋糕」。
我無言了。
我再一次望住個天，望唔透。到底呢個香港有幾多個係以廣東話做母語既中學生？
原文刊於此
没有评论:
发表评论