八方嘅讀者都知道我好唔鐘意白鴿黨嘅大佬政治，尤其係佢上次政改黑箱作業，八方都憤然食燒鴿。再加上呢輪特首篩選，呢個黨又放風話不一定要有「公民提名」，大有可能俾佢跣多鑊。
不過，見到人稱蔡狗嘅老鴿蔡耀昌，因為所屬組織支持司法覆核新移民綜緩嘅問題，俾人圍攻，骨鯁在喉，不吐不快。
話說蔡狗上星期五開記招，話因為綜緩案屢遭恐嚇，已報案處理。八方睇到報導，到蔡狗嘅面書一遊，成百幾人接力辱罵，並人肉搜尋，其實真係好離譜。
嘅然事件已經報案，本來八方都唔諗住寫，但係卻見到網上好多扭曲事件嘅評論。譬如話一個叫「正政唯識」嘅面書頁，就幫蔡狗整咗張圖，半點唔提佢屋企人受到騷擾，大意指蔡報警係因為有人叫佢「落地獄」：
圖片來自「正政唯識」
大家當然記者，半年前有仗義老師林思慧以 What the fuck 對抗警察封鎖線，兩個月前又有以路姆西 Mother fucker 來抗議梁振英。喺憤怒嘅香港社會裡， Go to hell 嘅咒罵當然係小兒科。所以，若無親身去蔡狗嘅面書一遊，睇完「正政唯識」嘅評論，第一個反應就係「蔡狗真小氣！」
因為八方有去圍觀蔡狗嘅面書，所以感受好唔同，因為啲言論的確是恐嚇。最明顯嘅係，有好幾個網民，唔單止針對蔡狗，仲侮辱埋佢老婆同兩、三歲大嘅女，包括喺佢個女嘅照片上寫上惡毒嘅詛咒如：「祝蔡耀昌所有家人早日生骨癌痛苦而死」、「多謝大陸新移民強姦自己老婆同個女」、「希望你全家今年發生意外死」等。
圖截取自蔡耀昌面書，惡毒評論附在蔡與女兒的家庭照上
試想想，若你因為做咗一啲野，而屋企人嘅相俾人周圍傳，並叫你小心屋企人會意外死或老婆同女俾人強姦，你會點？
積極製造「蔡狗小氣形象」嘅言論，分散喺唔同嘅面書頁到，另一個係「警察犯罪錄」嘅專頁，以趣聞嘅包裝指蔡狗「賣港賣到上差館」。
面書嘅社會網絡形成的印象，不斷在不同嘅平台複製再生產。獨媒專欄作者「民主黨評論團」亦以蔡狗處理網絡攻擊的手法而斷言「蔡耀昌此生無望入立法會」嘅預言，其中一個理據是：「選民只會想：民意代表就係要受民眾監察和批評，罵得大聲啲、寫得恨毒啲，便叫警察拉人，點選得你落呀！」
可見，網上對蔡狗嘅圍攻有多重戰線，包括政策（綜緩政策批評）、政治（白鴿政改立場漂忽）及個人（蔡狗小氣）。手段亦是多重，包括恐嚇攻擊、趣聞惡搞、印象式評論、正經政評。目的當然是要蔡狗無望入立法會。
如果八方住喺蔡狗嘅選區，我都唔會投俾佢。但係用恐嚇、抹黑嘅政治手段去令到對手「此生無望入立法會」，實在 cross the line。
當網絡政治越來越白熱化，網民更要頭腦清醒，切忌人云亦云，唔好俾人利用自己嘅憤怒。試想想，若果因為〈明報〉總編劉進圖係梁粉，所以今日〈明報〉被空降老總係「抵死」；若果因為〈AM730〉嘅老闆施永清曾杯葛唔落中原廣告到蘋果，所以今日〈AM730〉被抽廣告係「抵死」；若果因為蔡狗係白鴿黨並幫新移民，所以屋企人俾人起底，「招呼」佢地小心「意外死」係「抵死」。。。。。香港真係會齊齊「落地獄」
See you in Hell!
没有评论:
发表评论