今日港足有多場比賽喺港九新界上演，想睇有保証嘅，俾60蚊入旺角大球場有甲組聯賽傑志 vs 太陽飛馬，想睇其他比賽？九龍仔有乙組聯賽永義 vs 葵青，斧山道運動場有丙組油尖旺 vs 沙龍元老，天水圍運動場有丁組聯賽葛士寶朋友 vs 首飾等等，任君選擇，最怕你唔郁。
我參加咗《一個月甲乙丙丁睇到你仆街冚家鏟盲腸炎下照撐港足大行動》(簡稱盲撐港足行動)呢個性幻想飛機計劃，盡量每個月嘅4週抽時間睇4-5場現場比賽，甲乙丙丁各睇一場，因為香港足球唔止頂級聯賽嘅甲組，仲有乙丙丁組、預備組、女子聯賽及青年聯賽，今個月睇咗一場甲組，一場青年聯賽及兩場丁組，所以今日就選擇咗丙組觸目大戰油尖旺 vs 沙龍元老(駒騰)。
出發去斧山道運動場前應該做咩？應該食飯囉，人唔食飯點得呀？首先搭小巴出聯和墟，聯和墟有北區美食天堂之稱，多間北區著名餐廳都喺聯和墟，但係我就揀咗冇咩人堂食嘅《和豐園》，食咗個厚切餐肉蛋飯加屎汁(沙爹汁)加多杯凍茶多啲人奶，30蚊，普普通通嘅碟頭飯，要食平啲可以上街市，要食好啲可以去《群記》，要食簡單啲可以去《四眼仔腸粉》，但揀《和豐園》，就係貪呢度冇咩人，唔洗聽到咁多嘈雜聲，不過今日跑馬日，所以午市都有幾檯客賭馬，雖然我唔賭馬，連波都唔賭，但睇住佢地一邊食麵一邊屌老母屌到反起在甩埋出黎在用aa超能膠黐返在屌，明明唔識你都可以走黎話你知呢隻馬幾好幾Fit又剩，又真係幾有趣，不過如果賽馬只有賽馬，賽馬只有欣賞，冇得投注嘅話，今日《和豐園》午市分分鐘我一個包場。
我又諗起一個假設問題，港甲開賭，對香港足球之益處就係有錢袋，可以用呢啲錢搞青訓及提升球員人工等，壤處就係大部分人只為賭，你打成點關我柒事，最緊要我贏錢，我贏錢，你就係一個好球員，我輸錢我就屌你老母個臭，成百人喺旺角大球場門口企喺到等你出黎，啲球員就慘，冇得賭嘅時代已俾人屌到爆炸，有得賭嘅時代俾人屌得更勁，啲賭仔可能擋你係隻馬咁屌，香港足球可能多咗少少收入但就苦了一班球員咯。
講返場比賽先，現場有幾十個球迷喺看台睇比賽，以年青人為主嘅油尖旺不敗積37分暫列丙組第一，而擁有多位前甲組球員嘅沙龍元老(駒騰)就暫列第七，今場油尖旺派出鄭廷智、陳海彰、覃鉅晴等球員，沙龍元老就派出郭文迪、李韋狄、羅振南、阮健文、賴啟卓、楊熙智等球員，現場沙塵滾滾，不過冇咩好講，乙丙丁係咁上吓。
上半場沙龍元老攻勢較多，但油尖旺反擊速度高，戰情都幾緊張，16分鐘油尖旺攻勢，一個直線單刀破門領先1比0，22分鐘沙龍元老楊熙智近門撞射高出，半場完。
下半場油尖旺嘅邊後衛覃鉅晴K角位遠射略略高出，26分鐘油尖旺把握沙龍元老中場失誤單刀在射入成2比0。42分鐘沙龍元老底線傳中，似射似傳下笠入追至1比2，最後油尖旺 2-1 沙龍元老贏波繼續不敗，油尖旺嘅覃鉅晴攻守皆可，今日其中一個亮點球員。
睇得乙丙丁組，預咗有啲球員名不經傳，所以我呢啲未進入智能電話年代嘅原始人，如果決定去睇乙丙丁組，喺前一晚會抄低兩隊球員名單，在用Google揾吓陌生球員嘅資料，打咩位、打過咩球會，呢啲資料都會抄低喺筆記簿內，咁係因為我覺得有心去睇嘅，應該要有少少準備功夫，HKFA.COM資料不足係好正常，資料不足下就要靠自己去發掘，我末必認到場上22個人，但至少唔好連邊個叫羅振南、潘嘉煒都唔知，但我更希望HKFA.COM可以加返個球員冧把，雖然WFC。
没有评论:
发表评论