今日有一大堆港足比賽上演，早上有青年聯賽精英碟及精英盃，又有學界比賽，下午更有甲乙丙丁組多場聯賽，支持港足嘅球迷十分幸福因為有大把選擇，真係『唔怕冇波睇，只怕你唔睇』。而我呢，上週睇就完足總盃16強(偽大英足總盃)，今週就預選咗可能會兩場比賽二選一，一場係異地聯賽，印尼超級聯賽大戰，雅加達佩斯查主場對斯里維加亞，另一場就係喺北區運動場舉行嘅香港丙組聯賽淦源對沙龍元老(駒騰)，至於甲組聯賽，就應該留待今個月第4週了。
點解會揀呢兩場？就講吓印尼個場先啦，話晒我可能係大中華地區極少數會花時間關注印尼超級聯賽嘅人，因為家族有先人喺當地踢過國際賽，所以我早就對印尼足球充滿好奇，雖然我從來未去過當地入場觀戰，但話晒隔住部電腦用垃圾Livestream睇咗呢個亞洲3線職業聯賽6年有多，又因為咁所以花咗唔少時間去研究佢地嘅風俗，佢地嘅習慣，佢地嘅聯賽制度，透過他人文章、報導、圖片、影片去嘗試了解吓佢地足球文化，嘗試了解吓佢地球迷對足球嘅睇法，呢6年都多風雨不改，見証住佢地成立全新嘅職業聯賽，見証住佢地『鬧雙胞』，見証住港將史上首次登陸當地聯賽，或者係咁或多或少對呢個3線聯賽有啲『感覺』，而且佩斯查對斯里維加亞屬於其中一場印尼足球大戰，理應要睇。
不過，最後我都係選擇咗淦源對沙龍元老，因為，丙組又如何？丙組都係屬於香港足球嘅一份子，身為香港人當然支持香港波啦唔通支持菲律賓波咩，印尼超對我而言只係興趣而已，不幸撞時間嘅，咁印尼超只好樣步(除非自己非常非常非常非常非常想睇)。我其實就好似其他港足支持者咁，有啲一樣會睇英超，英超對佢地而言都係興趣，但大部分港足支持者始終將港足擺喺首位，我都係一樣，只不過你睇英超，我就睇印尼超，大家興趣不同而已。另外，雖然丙組聯賽只係業餘聯賽，印尼超級聯賽雖然有好多改善空間但比港甲要『職業』一點，但係對住部電腦同現場睇係兩回事，兩種感覺。佩斯查對斯里維加亞，如果可以嘅等有多啲錢淨在去現場啦。
講返正題，我都係住喺北區，揀呢場，除咗估計淦源想升班會去盡，預料比賽應該幾精彩之外，因為近，所以近幾季入場睇波點解我會常選大埔主場呢？除咗呢10年經常喺大埔出現久而久之有啲『感覺』，仲因為北區唔喺甲組咪去睇大埔囉，近我嘛。
今日成12點幾先起身，不過唔緊要，場波15點30分先打，時間多的是，於是乎決定由打鼓嶺行去上水，做毒撚嘅好處就係咁，無拘無束，我鐘意訓到幾時都得，我都唔明點解有咁多人講到世界未日咁，『緣』呢啲嘢，好難講嘅，不如開心啲面對日子仲好啦。打鼓嶺行去上水，之前行過好多次，最快紀錄都要一個鐘零四個字，其實有時間郁吓真係幾好，沿途可以欣賞吓風景，欣賞宏偉嘅山河以及中港一隔嘅景觀，簡直係毒撚的浪漫。
我由蓮麻坑路起行，經過老鼠嶺、週田村、木湖，途經深圳河及深圳羅芳，幾百年前呢度嘅居民可自由來往，勢估唔到今日成為兩個唔同嘅地方，然後經過新屋嶺，遠眺深圳黃貝嶺，幾百年前黃貝嶺同打鼓嶺嘅村民經常武鬥，打鼓嶺地名都係由此而來，今日黃貝嶺高樓林立，而打鼓嶺依然係一個鄉郊地，但我都係鐘意乜鳩都冇嘅打鼓嶺多啲，吹咩？
經過新屋嶺後就會進入文錦渡路，呢條路嘅景點就係比我碌鳩粗幾百萬倍嘅東江水管，不過我就冇乜興趣欣賞喇，轉入沙嶺道算，轉入沙嶺道做乜？咪返大陸囉！我地禁區居民返大陸不嬲經沙嶺道入羅湖關口，咁唔係去睇丙組咩？點解無啦啦返大陸，係咪行到黐Q咗線呀？梗係唔係啦，順路過關去免稅店買包煙兼去肯德基買葡撻，葡撻我淨係食肯德基架咋。吓！專登行去大陸買葡撻！？因為上水冇肯德基呀，上水廣場個間冇咗，要等上水匯完工上水先有肯德基，冇計。上水廣場今日一係賣衫一係賣金一係賣電器，平啲嘅餐廳都少，變咗應付自由行嘅廣場，都唔係我呢啲人去架喇，今日我去上水廣場嘅理由就只係借廁所呵屎同搭巴士，北區人想食肯德基，暫時要等，一係去粉嶺，一係返大陸囉，不過我有禁區紙唔洗搭火車啫，有邊個上水居民會為咗肯德基而返大陸？會嘅我諗要同我一齊約埋去申請十級殘障資助計劃，上水居民想食肯德基叫外賣速遞算喇。
講返正題，過返關返香港我就行返出去文錦渡路，經過邊境檢查站、虎地坳、狗房、鳳溪，在轉入天平路，終於到達北區運動場喇！加埋加埋行咗三個幾鐘呀！去到都就快開波，今次真係幾講返正題，場內都有成7-8名咁多嘅球迷專程黎捧場，淦源身穿黃色球衣，主力李浩和、戴文成、徐耀忠等都有到場，而沙龍元老則有羅振南、黎雅彥、阮健文、楊熙智等正選上場，5分鐘沙龍元老先失守，10分鐘沙龍元老有球單刀但射唔入，15分鐘淦源40碼罰球中楣彈出，之後26分鐘淦源角球攻勢，搶頂成功後沙龍元老球員用手將個波由白界前拍出，淦源獲得12碼射成2比0，到咗35分鐘淦源靠邊路出波禁區迎頂呢招在擴大比數到3比0。
下半場，少打一人嘅沙龍元老靠黎雅彥嘅二傳追返一球，但之後元老擺烏龍，到完場在比淦源下多一成，全場比分淦源贏5-1。
今場比賽節奏明快，即使冇執波仔影響流暢度，但我覺得幾好睇，最少我睇到好入神，就算龍友揾女模特兒入黎取景影相我都係完場喺坐隔離係咁問你係咪13兄係咪13兄係咪13兄嘅球迷話我知我先知有啲咁嘅事發生過，不過淦源表現係好啲，抵贏，但上半場第一球有啲爭議，元老球員認為呢球係越位，所以球員們情緒非常激動，而我眼睇嘅....都係唔講，球例呢啲我識條春。
全場小統計：
淦源 5-1 沙龍元老
淦源
射門( 中門)：23次(11)
犯規 ( 越位)：5(7)
角球：3
黃牌：1
紅牌：0
沙龍元老
射門( 中門)：11(6)
犯規 ( 越位)：7(2)
角球：4
黃牌：0
紅牌：1
没有评论:
发表评论