近日，巴西世界盃熱爆全城，但最辣㷫我的是香港連日受襲的世界「悲」。我們的香港已面臨最嚴峻的境況，中共唔再畀面，直頭搲爛塊面，發表「蠍子過河」的白皮書，誓要毒死七百萬隻縮頭烏龜；新界東北發展，政府擺明強姦民意，強姦完再強姦，讓你們要麼習慣，要麼就自動患上斯德哥爾摩症候群吧。
人哋巴西就有世界盃，我哋香港就有世界「悲」；人哋就激戰南美，我哋就奮戰東北；人哋就打得火熱，我哋就水深火熱；人哋就落場無父子，我哋就聽話兩爺孫；人哋就買飛入場，我哋就有人賣港入共；人哋就有球証，我哋就快死無對證；人哋就比賽第二，友誼第一，我哋就乜都第二，總之愛國第一。
突然，仲畀個白皮球抽射埋嚟，但唔係旋轉弧飛死角咁有技術，而係14億個波一齊飛向龍門，黐晒線，夾硬嚟嘅，對，就像少林足球最後場波一樣，但我哋普通市民又點會識搬龍門，唔通要睇住個波入網？唔得！因為入咗，唔單只輸一球，仲會輸一世，所以大家唯一可以做就係一齊衝落球場以死相擋，守衛我們最後的防線。
你們知不知道，一場比賽，如果沒有規則，就變成了戰爭。戰爭只有輸贏，沒有打和，渴望和平，就只有打勝仗。現在白皮書已經破壞了規則，剩下的只有手段跟目的，它就是一本戰書，為戰爭掀起了序幕。
轉載自《新報》
没有评论:
发表评论