香港政府好似我公司呀姐做野一樣，未到死個刻都存在無限變數；但係「講過唔算數」同「講多錯多」方面，教育局必定係咁多個局當中首屈一指的了。
近日，香港教育局再次「瀨野」，無啦啦講廣東話非法定語言，轉頭又「灑冧」。每次見到佢「玩野」，我都諗起李思捷個句：「我玩你，因為我愛你」，教育局歷年來咁玩我，仲唔係愛到我欲罷不能。
今次我想分享教育改革下，我是如何中招的：
我是1988年出世的，剛好就是香港最發達的年代。香港是我家，作為家庭成員，這廿幾年來，我真的是狠狠的明白到什麼是家道中落。
--> 1997前，除了社科健變為常識令我睇少左教育電視之外，真的無咩野。之後，就開始「瀨野」了。
--> 1998至2000年，每日都是學能測驗，我就是最後一屆的學能測驗考生，傳說中做得最多年學能測驗past paper的小朋友，日以繼夜，夜以繼日做past paper。完成左個測驗，我真係覺得我仲唔係宇宙最強，超智能小朋友。點知教育局竟在2000年，教育制度改革建議話：
「學能測驗操練學生應付學能測驗的現象，影響學生的均衡學習生活，妨礙他們的全人發展。我們必須作出果斷的決定，立即取消學能測驗，避免有更多學生的學習生活受到不良影響。」
教育局講左一野，一夜之間，我就由能人所不能變左超低能，我仲記得我之後個屆的小朋友sss即時取消補課，仲因為不用再做超智能的past paper 而取笑我地係低能仔。
--> 1998年的母語教學，我又再次中招啦，母語教學係1998年開始嘅，1999年選中學的我，又再次成為改革的中伏人士了。1999年，香港cut 到得返102間中學有得用英文教學，無啦啦，界定一個小朋友係唔係成功人士，就以入唔入到英中做指標。後來教育局又話母語教學政策令學生接觸英語的機會大減，去到2010年又話唔要母語教學，變做教學語言微調政策。
--> 2005年，我中學會考，我仲要讀中文科的26篇範文，當中有「只有陳蕾士至明」的《聽陳蕾士的琴箏》，我一考完，2005年5月，教育局又宣佈由2007年開始取消範文，以免學生過分背誦。真係「害怕悲劇重演，我的命中命中…」
--> 終於我都捱到2007 年考大學，我又發現，我又再次中招啦。1997年開始有內地招考香港本科生計劃，1997個時有幾個內地人報香港八大，2007 年內地報名人數就好似細胞分裂咁，有成千人，我又再一次要同人(唔使係香港交稅的人)爭位(資助學額)讀書。「沒有最多人，只有更多人」，由於我係1988年的龍年BB 潮BB，2007年報大學的人數創了新高。
--> 我就好似唐三藏取西經咁，經歷了七七四十九劫，2007年，我終於入到大學啦。但為左要配合2012年推行三三四，由我入大學開始，我間大學就變成建築工地，日日都沙塵暴咁掘來掘去。2011年，我畢業了，大學終於都接近完工。個情形就好似小學個時，學校向我地籌募經費裝冷氣，裝完我又畢業啦，哈哈哈哈。
我其實唔係想好似周星星同梁榮忠咁鬥「邊個夠我慘」，申訴邊年的學生最慘。
我想話朝令夕改的香港教育制度，對於係香港讀左20 年書的我來說，我一直覺得我係一塊5吋厚的牛排，教育局咪就係每5秒反我一次嘅廚師囉，你係咁將我反來反去，其實我由頭都尾都冇熟過架大佬。你個政策每5秒改一野，就算個政策work 都冇用的。我只想教育局不要再「煎」熬D 學生，如果「我玩你，因為我愛你」的theory 成立，可唔可以我地呢代人接收哂教育局的愛意，唔好再搞而家d學生。
PS: 謹致此文予1988年出生，同我一齊中招，連環遭逢橫禍的龍年BB，真係「講呢D，盡在不言中。」
没有评论:
发表评论