呀媽落街買餸見到622公投banner，有10萬個為什麼？呀媽讀書唔多，但佢係睇電視方面相當出色，我嘗試用選視帝theory解釋。
622公投係問你想點樣提名同選特首，有兩條題目：
問題一：有三個選特首方案，請你選一種？
1. 「真普選聯盟方案」--「三軌方案」包含公民提名、政黨提名及提名委員會提名。
舉例說明，要提名黎耀祥做視帝，有3個途徑：
- 觀眾提名：只要黎耀祥集合到全香港1% 的觀眾支持，黎耀祥就可以候選做視帝。
- 團隊提名：對上一次選視帝，樂小姐藝人團隊總得票有5%，樂小姐藝人團隊今次就可以提名黎耀祥。(同樣地，珍姐其下藝人團隊上次總得票有5%，都可以提名其他明星，例如陳豪)
- 提名委員會提名：提名委員會入面有樂小姐，珍姐，TOMMY 等千幾個TBB嘅人。(提名委員會會確保黎耀祥就算唔鐘意TBB，都可以選視帝)
2.「人民力量方案」-- 提名委員會組成：由現屆所有民選區議員及立法會議員組成。
同樣都係想提名黎耀祥做視帝，有3個途徑：
提名委員會唔一定係樂小姐，珍姐佢地。所有觀眾會透過區議會同立法會兩次直選投票選出代表佢地嘅「精英觀眾」。
- 觀眾提名：只要黎耀祥集合到全香港1% 的觀眾聯署支持佢，佢就可以做候選視帝啦。
- 提名委員會提名：黎耀祥可以找區議會直選出來5%嘅「精英觀眾」提名佢。
- 提名委員會提名：黎耀祥可以找立法會直選出來5%嘅「精英觀眾」提名佢。
3.「學界方案」-- 雙軌並行的方案，第一軌是「公民直接提名必不可少」，第二軌則是由提名委員會提名
同樣都係想提名黎耀祥，有2個途徑：
- 觀眾提名：只要黎耀祥集合到全香港1% 的觀眾聯署支持佢，佢就可以候選做視帝啦。
- 提委會提名：所有觀眾會透過立法會投票直選出代表佢地的「精英觀眾」，黎耀祥可以找8%的「精英觀眾」支持佢，黎耀祥就可以候選做視帝啦。
***作為觀眾，選以上3個方案，你都有提名黎耀祥的權利，同時你最後可以用你手上個票投黎耀祥做視帝。***
問題2（原裝）
如果用政府而家提議的方案，即係只有千幾人選左D 特首SSS，再比你選，你覺得：
（請注意：如果你想選長毛，唔得嘅，因為只接受呀爺培訓過嘅參選人。）
A) 立法會應該say no（應予否決）
B) 立法會應該say yes（不應否決）
C) 唔鬼知…（棄權）
問題2（解釋比呀媽知，選視帝Version）
如果用TBB提議方式選視帝，即係又係珍姐，樂小姐個班人選左最後5強，再比你選，你覺得：
（請注意：如果你想選港視嘅智叔做視帝，係唔得嘅。因為王維基唔係個提名委員會入面嘅，所以只有樂小姐同珍姐培訓過嘅先可以參選。參選人一定要愛TBB，雖然你明明係有睇港視節目同撐WIKI WONG）
A) 唔想選（應予否決）
B) 都繼續選（不應否決）
c) 唔鬼知…（棄權）
上面個兩條問題，你係唔需要兩條都答嘅…
- 如果你覺得而家個制度選視帝，樂小姐同珍姐佢地決定哂，你條氣唔順，你就可以答問題一，選3個新方案其中一個。
- 如果你覺得又係用返TBB 個套，黎耀祥選到都唔係實至名歸嘅，你就可以答問題二啦。
「如果我想投，要點做？」
- 622公投係唔使好似選港姐或者東張西望FUN FUN選咁用智能手機嘅，你可以直接殺去選舉場地投票嘅。
我絕對相信，同呀媽解釋唔容易…
- 因為我呀媽都學左大約一個世紀，先識留言信箱要DO 左先講野，等我可以唔使每次只聽到20-30% 留言。
- 因為我呀媽係從未成功打去電話公司，撳到個客戶服務主任出來對話。
但我對呀媽係有信心嘅，我知道我肯講，就算佢唔投，你都會肯聽嘅…
- 投票與否純屬呀媽個人決定，講完一大輪，呀媽都有機會覺得樂小姐同珍姐嘅眼光先係世界最獨到嘅，但講左，呀媽最少係會得個知字。
我相信公民責任不止於自己知，如果你明而你feel 到你呀媽唔明，不如行多一步講解比佢知呀。
PS. 當TBB 視帝選得唔岩觀眾心水，大家都要發動電視城遊行活動，何況係選特首呢。好啦，以上所有都只係比喻，如果你睇完，好有興趣，請你務必詳閱以下網站。
原文載於姐死姐還在專頁
没有评论:
发表评论