星期日，有咩做？去拖阿婆過馬路？去做義工？去做兼職？梗係去睇香港U16對中國U16之後在搏下場丁組雙料啦，呢啲毒到喊嘅節目，我最鐘意啦。
一早8點就起身，梳洗之後就行去村口等小巴，仆你個臭街，唔知邊個隻狗喺半路呵屎，唔小心踩中，仲要俾篤狗屎滑咗一嘢，好彩我身手唔錯，否則可能成為史上首位因為踩中狗屎兼滑倒地上仆街而死嘅人。
行到去村口啱啱有小巴，仆你個臭街，喺我前面調頭，完全擋我WFC，雖然我係WFC小王子，但俾返幾分面我好喎，攪到我苦等咗十分鐘，你咁搞法我真係半夜三點起身行去蒲崗村算喇，但我又唔會一味怪啲師機，因為我了解過，根本就係呢條線嘅公司搞出黎嘅問題，畸形嘅制度運作之下，只會惡性循環，只係屌啲師機冇撚用架。
十分鐘之後終於有車上，俾篤狗屎同架小巴搞到去到聯和墟已經9點幾，上到去到蒲崗村成10點幾又遲到，好彩一入場香港U16就黎個笠射得手，不過對家基本功及所有嘢係好啲，半場和到算係咁。下半場香港U16有個十二碼但浪費咗，之後大部分時間都係退守，最後補時有凸嘅情況之下角球失守，真係欲哭無淚，不過表現算係咁，中國U16及卡塔爾U16唔易打，所以我都唔走企喺到俾返啲掌聲呢班未來之星。
之後做乜？梗係去西貢睇丁組啦唔通去西貢食海鮮咩，落車即去運動場睇福建對瑞聯，瑞聯又唔多齊人，所以上半場福建已經領先7比0，福建已經唔係太好個隊，真係慘不忍睹，於是乎下半場出咗去鳩行，圖書館球迷去圖書館啱哂啦，睇吓亞洲週刊扮吓Goal3會員沈旭暉好過，等夠鐘在返去，問職員之下得知瑞聯吞16蛋，即使對瑞聯冇乜好感都覺得慘，可能呢啲就係身同感受，屌，16比0啫？差唔多20比0我都試過，俾人大炒係不是味兒架喇，實力唔夠冇計架喇，不過千祈唔好放棄呀雖然今季肯定包尾，依家仲末有一分，首要目標梗係要破0啦。
尾場西貢對離島，西貢雙料重點，看台上有唔少人，2-300人到啦，不過有270人係菲律賓妹咁解，次次星期日黎親 西貢都覺得呢個運動場好似菲律賓主場，我連去對面買個蛋撻都要同佢地搶咁滯，呢班菲律賓妹喺運動場聚集只係貪呢度有得坐一日，不過有啲菲律賓妹真係有睇場波架，仲有老老實實呢個運動場睇波角度一流，唔信嘅今個星期去睇吓。
講返場比賽，西貢整體實力係好啲，唔關主場效應事，16分鐘黃廣添接應斜傳躺射破網領先1比0，37分鐘曾家威喺娥眉月起腳遠射，呢球有少少撻，球速唔快，但正好笠死企錯位嘅對方守門員。不過離島唔係一味捱打，39分鐘盧康銘頭鎚破網追近1比2。但呢頭入完到個頭入，西貢喺K角位有個罰球，曾家威直接主射破網成3比1，世界波！
下半場54分鐘曾家威遠射得手將紀錄拉開成4比1，之後黃德光又喺咁上吓位置黎個遠射，最終西貢贏5比1。
今季丁組實力好分明，可以分四線：
一線：
葛士寶
中西區
西貢
二線：
首飾
東昇
三線：
離島
福建
龍門
聖約瑟
彩俊北區
四線：
瑞聯
没有评论:
发表评论